Maliyyə

Ana səhifə

Maliyyə

«Alfa Sığorta» şirkəti avtomobil sığortası bazarına yeni məhsul çıxarıb

11 noyabr 2010 07:39 (UTC +04:00)

Bakı. Elnur Hüseynquluyev – APA-Economics. Azərbaycanın «Alfa Sığorta» şirkəti avtomobil sığortası ilə bağlı bazara «Alfa Milaj» adlı yeni məhsulunu təqdim edib. Bununla bağlı keçirilən təqdimatda şirkətin Müşahidə Şurasının sədri Xəyal Məmmədxanlı bildirib ki, bu məhsul ölkədə ilk dəfə tətbiq olunur və avtomobilin bir il ərzində qət edəcəyi məsafəyə görə sığorta haqlarının ödənilməsini nəzərdə tutur.

X.Məmmədxanlının sözlərinə görə, bu məhsul avtomobilindən az istifadə edən vətəndaşlar üçün əvəzolunmaz bir təklifdir: «Sığorta riskinə ən çox təsir edən amillərdən birinin avtomobilin il ərzində istifadə edilmə tezliyi və qət etdiyi yol olmasına baxmayaraq, bu gün Azərbaycanda belə bir fərqləndirmə aparılmır. İlin əksər dövrünü qarajda saxlanılan avtomobillə, gün ərzində 20 saat sürülən avtomobilin eyni sığorta haqqı ödəməsi düzgün hesab edilmir».

Bundan başqa, X.Məmmədxanlı tədbirdə şirkətin yeni internet səhifəsində yaradılmış imkanlar və yeniliklərdən danışıb. Belə ki, müştərilər www.alfa.az saytında e-Alfa adlanan bölmədə sığorta hadisəsi barədə sənədləri on-line təqdim etmək, sorğular vermək, sığorta növləri üçün on-line müraciət etmək, sığorta şəhadətnamələrini müvafiq ünvanlara sifariş vermək və ən əsası sığorta haqlarını internet vasitəsi ilə ödəmək imkanlarından istifadə edə bilərlər.

Tədbirdə Şura sədri daha sonra şirkətin «Yaşıl kart» sığorta şəhadətnamələrinin Azərbaycandakı satışından danışıb. İndiyədək şirkət tərəfindən 20-dək «Yaşıl kart» sığorta şəhadətnaməsi satılıb. Şirkət yaxın vaxtlarda bununla bağlı daha bir layihə həyata keçirmək niyyətindədir və bu layihə nəticəsində 100-dək «Yaşıl kart» sığorta şəhadətnaməsinin satılacağı gözlənilir.

Tədbirdə X.Məmmədxanlı şirkətin daha bir yeniliyi haqqında məlumat verib. Pasport formasında hazırlanmış «Səfər sığortası» şəhadətnamələrini nümayiş etdirən sədr dəyişikliyin yalnız forma deyil, yeni sığorta təklifində standart təminatlarla yanaşı yükün itməsi, səfərin ləngiməsi təminatı, həmçinin xarici ölkə ərazisində müştərilərə hüquqi yardım göstərmək imkanlarının yaradıldığını da qeyd edib.

Xatırladaq ki, səhmdarı (100%) «Texnikabank» ASC olan «Alfa Sığorta» 1997-ci ildən fəaliyyət göstərir. Şirkət müştərilərə 25 sığorta növü üzrə xidmətlər təklif edir.