Maliyyə

Ana səhifə

Maliyyə

Gələn ay «Alfa Sığorta» şirkətinin səhmdarlarının iclası keçiriləcək

12 noyabr 2010 07:17 (UTC +04:00)

Bakı. Elnur Hüseynquluyev - APA-Economics. Bu ilin dekabr ayında Azərbaycanın «Alfa Sığorta» şirkətinin səhmdarlarının növbəti iclası keçiriləcək.

Bunu “APA-Economics”ə açıqlamasında şirkətin Müşahidə Şurasının sədri Xəyal Məmmədxanlı bildirib.

X.Məmmədxanlının sözlərinə görə, iclasda səhmdarlar tərəfindən şirkətin növbəti il üçün hazırlanan strateji planının təsdiqi, nizamnamə kapitalının artırılması, həmçinin 2011-ci ildə kənd təsərrüfatı sahəsinə diqqətin artırılması və digər cari məsələlər müzakirə olunacaq.

X.Məmmədxanlı bildirib ki, nizamnamə kapitalı Maliyyə Nazirliyi tərəfindən hazırlanan qrafikə uyğun artırılacaq: «Azərbaycanda bir neçə sığorta şirkəti nizamnamə kapitalını daha yüksək məbləğə çatdırmağa can atır. Lakin biz həmin şirkətlərdən fərqli olaraq, sığorta şirkətləri üçün hazırlanmış qrafikə uyğun addım atacağıq. Çünki kapitalın yüksək artımının heç bir effekti yoxdur. Azərbaycanın sığorta bazarının risk tutumu hamıya bəllidir».

X.Məmmədxanlı həmçinin qeyd edib ki, şirkət növbəti il ərzində kənd təsərrüfatının sığortası proqramını daha da genişləndirmək niyyətindədir: “Kənd təsərrüfatının sığortası şirkətin ümumi portfelində 10%-lik paya malikdir. Bu rəqəm bizim üçün olduqca az görünür və düşünürük ki, növbəti ildə portfeldə bu sektorun payını daha da artıraq. Biz kənd təsərrüfatı sektorunun sığortalanması prosesini mənfəət əldə etmək məqsədilə deyil, zərər etmədən inkişaf etdirmək niyyətindəyik”.

Xatırladaq ki, səhmdarı (100%) «Texnikabank» ASC olan «Alfa Sığorta» 1997-ci ildən fəaliyyət göstərir. Cari ilin yanvar-oktyabr aylarında şirkətin topladığı sığorta haqlarının həcmi 1,9 mln. manat, sığorta ödənişləri 170 min manat, mənfəəti isə 0,5 mln. manat təşkil edib. Şirkət müştərilərə 25 sığorta növü üzrə xidmətlər təklif edir.