Maliyyə

Ana səhifə

Maliyyə

Azərbaycan Beynəlxalq Bankı 130 mln. dollarlıq sindikatlaşmış kredit cəlb edib

12 noyabr 2010 15:14 (UTC +04:00)

Bakı. Vahab Rzayev - APA-Economics. Azərbaycan Beynəlxalq Bankı 51 mln. ABŞ dolları və 56 mln. avro (məcmu 130 mln. dollar) məbləğində olan sindikatlaşmış kreditin cəlb edilməsi üzrə saziş bağlayıb.

Bankdan “APA-Economics”ə verilən məlumata görə, bu əməliyyat Bank tərəfindən beynəlxalq maliyyə bazarlarında 2010-cu ildə bağlanmış ən iri sazişlərdən biridir ki, bu da dünya maliyyə böhranı zamanı və beynəlxalq maliyyə bazarlarında maliyyə vəsaitlərin defisiti fonunda xarici investorlar tərəfindən ABB-yə olan etimadın göstəricisidir.

Bankın mətbuat xidmətinin rəhbəri Rauf Ağayevin sözlərinə görə, kreditin ilkin məbləği 100 mln. dollar həcmində nəzərdə tutulub, lakin sonradan bu məbləğ investorlar tərəfindən 180 mln. dollara qaldırılıb. ABB isə öz növbəsində krediti iki tranşla 130 mln. dollar məcmu həcmində almaq niyyətini bildirib. Kreditin faiz dərəcəsi LIBOR/EURIBOR+2,75% illik təşkil edir. Kredit 1 il müddətinə ayrılır və onun ümumi məqsədlərə, ticarət əməliyyatlarının maliyyələşdirilməsinə istifadə edilməsi nəzərdə tutulur.

Sindikatlaşmış kreditin səlahiyyətli təşkilatçıların sırasında “Citibank”, “Commerzbank Aktiengesellschaft”, “Raiffeisen Bank International”, “Standard Chartered Bank” və “Standard Bank Plc.” kimi iri beynəlxalq maliyyə institutları var. Ümumilikdə sindikatlaşmada müxtəlif ölkələrin 18 bankı iştirak edir və bunların sırasında “Demir-Halk Bank” (Hollandiya), “Coöperatieve Centrale Raiffeisen-Boerenleenbank”, “Landesbank Berlin AG”, “FBN Bank”, “Landesbank Baden-Württemberg” və “UniCredit Bank Austria” var.

Xatırladaq ki, ABB xaricdən maliyyə vəsaitləri cəlb etməyə 2001-ci ildən başlayıb ki, həmin ildə ABB Azərbaycanda ilk dəfə olaraq 10 mln. dollar həcmində sindikatlaşmış krediti cəlb edib. Bundan sonra bank 2005-ci ildə 56 mln. dollar (19 bankdan ibarət sindikatlaşma), 2006-ci ildə 130 mln. dollar (25 bank), 2007-ci ildə 140 mln. dollar (26 bank) və 2008-ci ildə 173,5 mln. dollar (28 bank) həcmində kreditləri cəlb edib. Qeyd edək ki, 2007-ci ildə ABB Azərbaycan bank sistemi tarixində ilk dəfə olaraq 100 mln. dollar məbləğində subordinasiya krediti cəlb edib.