Maliyyə

Ana səhifə

Maliyyə

Azərbaycan Mərkəzi Bankı likvidliyin verilməsi əməliyyatlarının həcmini artırıb

13 noyabr 2010 07:44 (UTC +04:00)

Bakı. Vahab Rzayev - APA-Economics. Azərbaycan Mərkəzi Bankı 2010-cu ilin 9 ayı ərzində pul siyasəti alətlərində əhəmiyyətli dəyişikliklər etməyib, işgüzar aktivliyin və iqtisadi artımın dəstəklənməsi məqsədilə faiz dəhlizinin parametrlərini dəyişməyib, uçot dərəcəsini 2%, dəhlizin aşağı həddini 1%, yuxarı həddini isə 7% səviyyəsində saxlayıb.

“APA-Economics”in xəbərinə görə, bu barədə Mərkəzi Bankın 2010-cu ilin yanvar-sentyabr üzrə Pul siyasəti icmalında deyilir.

Hesabat dövrü ərzində məcburi ehtiyat normaları da dəyişdirilməyərək 0,5% səviyyəsində saxlanılıb. Məcburi ehtiyat normalarının ortalama müddətinin dövr ərzində həm manat, həm də xarici valyutada depozitlər üzrə 1 ay olaraq qalması banklar tərəfindən likvidliyin optimal tənzimlənməsinə əlverişli şərait yaradıb.

Nəticədə cari ilin 9 ayı ərzində Mərkəzi Bank öz likvidlik pəncərəsini açıq saxlayıb, əməliyyatlar üzrə saldo ilin əvvəlindəki 1 454 mln. manatdan oktyabrın 1-nə 1 709,4 mln. manata çatıb:

(mln. man.)

	01.01.2010	01.10.2010
Likvidliyin verilməsi	1 483,5	1 755,2
Likvidliyin cəlb olunması	29,5	45,9
Likvidlik saldosu	1 454	1 709,4

Qeyd edək ki, likvidlik saldosu AMB-nin likvidliyin verilməsi alətlərinin qalığı ilə likvidliyin cəlb olunması əməliyyatlarının qalığı arasındakı fərqi ifadə edir. Beləliklə, cari ildə Mərkəzi Bank hələ də bank sisteminin dəstəklənməsini zəruri sayır.