Maliyyə

Ana səhifə

Maliyyə

Azərbaycan Kredit İttifaqları Assosiasiyası üzv təşkilatlar üçün təlimlər keçirəcək

06 yanvar 2011 07:37 (UTC +04:00)

Bakı. Elnur Hüseynquluyev – APA-Economics. Azərbaycan Kredit İttifaqları Assosiasiyası (AKİA) yanvarın 17-dən üzv ittifaqlar üçün təlimlərə başlayacaq. Bunu «APA-Economics»ə açıqlamasında AKİA-nın İdarə Heyətinin sədri Elçin Bağırov bildirib.

E.Bağırovun sözlərinə görə, fevralın 19-dək davam edəcək təlimlər «Kredt ittifaqlarının idarəçiliyi» mövzusunda təşkil olunacaq. Təlim Kanadadan dəvət olunmuş mütəxəssis Henri Nayt tərəfindən keçiriləcək.

Dünya Bankının «Kənd yerlərinin kreditləşməsi layihəsi» çərçivəsində təşkil olunan bu təlimin Bakı, Naxçıvan, Gəncə, İmişli, Beyləqan, Şəki və Bərdə keçirilməsi nəzərdə tutulub.

Bundan başqa, E.Bağırov yanvar ayının 9-da Polşalı mütəxəssis Pavel Djezinin də seminarla bağlı Bakıya dəvət olunduğunu bildirib. Polşalı mütəxəssis Azərbaycanda «Kredit ittifaqları haqqında» qanunun təkmilləşdirilməsi, qanunun beynəlxalq standartlara uyğunlaşdırılması mövzuları ilə bağlı öz tövsiyələrini verəcək.

Xatırladaq ki, AKİA 2003-cü ildən fəaliyyət göstərir. Azərbaycandakı 79 kredit ittifaqından 70-i qurumun üzvüdür. Assosiasiyanın üzvü olan kredit ittifaqlarının 35-i kənd təsərrüfatının kreditləşməsində iştirak edir. Quruma kredit ittifaqları tərəfindən ödənilən rüblük üzvlük haqqı 100 manat, yeni qəbul edilən ittifaqlar üçün isə 30 manat təşkil edir.