Maliyyə

Ana səhifə

Maliyyə

Avro son 4 ayda minimum həddə qədər ucuzlaşıb

08 yanvar 2011 09:30 (UTC +04:00)

Bakı. Vahab Rzayev - APA-Economics. Yanvarın 4-də dünya bazarlarında avronun dollara qarşı məzənnəsi 1,29 dollaradək düşüb ki, bu da 4 aylıq minimumdur.

“APA-Economics”in xəbərinə görə, sonuncu dəfə bu cür məzənnə ötən ilin avqustun axırlarında müşahidə olunub.

Bunun iki əsas səbəbi var. Bunlardan biri Avropa ölkələrində borc böhranının davam etməsi, digərisə ABŞ iqtisadiyyatında bərpa əlamətlərinin bir-birinin ardınca güclənməsidir. Bu əlamətlərə ilk növbədə işsizliyin dekabr ayında kəskin azalmasını aid etmək olar.

Qeyd edək ki, dünya bazarlarında avro-dollar valyuta cütlüyünün dinamikası Azərbaycanda məzənnələrə elə də təsir etmir. Avro-manat və avro-dollar məzənnələri ötən ilin avqust ayından dünya bazarlarındakı dinamikaya uyğun deyil ki, bunun da əsas səbəbi Azərbaycan Mərkəzi Bankı tərəfindən məzənnə siyasətini bivalyuta səbəti prinsipi əsasında qurulması olub. Lakin bundan sonra dolların və avronun dünya bazarlarında dəyişkənliyinin Azərbaycana təsiri daha güclü olacaq.

Xatırladaq ki, Mərkəzi Bankın İdarə Heyətinin qərarı ilə yanvarın 10-dan başlayaraq ölkədə məzənnə siyasəti bivalyuta prinsipi əsasında deyil, dollar-manat məzənnəsinin ikitərəfli hədəflənməsi prinsipi əsasında qurulacaq.