Maliyyə

Ana səhifə

Maliyyə

«Azal Sığorta» şirkəti ötən il sığorta ödənişlərini 33 dəfə artırıb

11 yanvar 2011 13:33 (UTC +04:00)

Bakı. Elnur Hüseynquluyev – APA-Economics. Azərbaycanın «Azal Sığorta» şirkətinin 2010-cu il ərzində topladığı sığorta haqlarının həcmi 12,113 mln. manat təşkil edib ki, bu da 2009-cu ilin yekun göstəricisi ilə müqayisədə 8,4% azdır.

Şirkətin baş ofisindən «APA-Economics»ə verilən məlumata görə, hesabat ilində «Hava nəqliyyatı vasitələrinin sığortası» növü üzrə 7,953 mln. manat, «Hava nəqliyyatı vasitələri sahiblərinin mülki məsuliyyətinin sığortası» üzrə 2,853 mln. manat və «Ümumi mülki məsuliyyətin sığortası» növü üzrə isə 369,920 min manat sığorta haqqı toplanılıb. Yuxarıda qeyd olunan növlərin məcmu sığorta haqlarında xüsusi çəkisi isə müvafiq olaraq 65,7%, 23,6% və 3,1% təşkil edib.

Təhlil olunan il ərzində şirkət könüllü sığorta növləri üzrə 12,020 mln. manat, icbari sığorta növləri üzrə isə 93,922 min manat toplayıb.

Ödənişlərə gəldikdə isə, şirkətin sığorta hadisələri üzrə ödənişləri 33,3 dəfə artaraq 4,077 mln. manata çatıb. Burada ən çox vəsait «Hava nəqliyyatı vasitələrinin sığortası» (4,033 mln. manat və ya 99%) və «Fərdi qəza və xəstəlik sığortası» (26,850 min manat və ya 0,6%) növləri üzrə ödənilib.

Qeyd edək ki, ötən il şirkət tərəfindən aparılan ödənişlərin hamısı könüllü sığorta növləri üzrə həyata keçirilib.

Xatırladaq ki, təsisçisi «Azərbaycan Hava Yolları» QSC olan «Azal Sığorta» şirkəti 1995-ci ildən fəaliyyət göstərir. Hazırda şirkətin nizamnamə kapitalı 8,138 mln. manat təşkil edir. Şirkət 16 könüllü və 2 icbari sığorta növləri üzrə xidmət göstərir.