Maliyyə

Ana səhifə

Maliyyə

Azərbaycan Maliyyə Monitorinqi Xidmətində ötən ilin yekunları ilə bağlı iclas keçirilib

12 yanvar 2011 08:04 (UTC +04:00)

Bakı. Vahab Rzayev – APA-Economics. Azərbaycan Mərkəzi Bankı yanında Maliyyə Monitorinqi Xidmətində (MMX) 2010-cu ilin yekunlarına dair iclas keçirilib. Xidmətdən «APA-Economics»ə verilən məlumata görə, iclasda qurumun direktoru Adışirin Qasımov 2010-cu ilin Azərbaycanın cinayət yolu ilə əldə edilmiş pul vəsaitləri və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə (PL/TMM) sahəsində əldə etdiyi mühüm nailiyyətlərlə əlamətdar olduğunu qeyd edib.

İclasda bildirilib ki, ötən il normativ hüquqi bazanın beynəlxalq standartlara uyğunlaşdırılması, MMX-nin institusional və funksional potensialının formalaşdırılması, monitorinq subyektlərinə metodoloji dəstəyin göstərilməsi, ölkədaxili və beynəlxalq əməkdaşlığın yaradılması istiqamətində qarşıya qoyulmuş hədəflər tam şəkildə reallaşdırılıb. «PL/TMM sisteminin inkişafı istiqamətində qısa müddət ərzində həyata keçirilən məqsədyönlü və ardıcıl tədbirlər sayəsində ölkəmizin bu sahədə beynəlxalq imici əsaslı şəkildə yüksəlib. Nəticədə, 2010-cu ilin oktyabr ayında Azərbaycanın FATF-ın monitorinq rejimindən çıxarılması barədə qərar qəbul edilib. Avropa Şurasının MONEYVAL Komitəsi tərəfindən Azərbaycanın PL/TMM sahəsində qanunvericilik sisteminin inkişaf modelinin digər dövlətlər tərəfindən nümunə kimi qəbul olunması tövsiyə edilib», - deyə MMX-dən bildirilib.

Azərbaycanda PL/TMM sisteminin tam funksionallığının təmin edilməsi məqsədilə bu sahə üzrə beynəlxalq standartlara və qabaqcıl dünya təcrübəsinə uyğun normativ hüquqi bazanın formalaşdırılması tədbirləri də təmin edilib ki, bu istiqamətdə Nazirlər Kabinetinin qərarları ilə iki, Xidmətin qərarları ilə beş qayda təsdiq edilib. Xidmətin institusional və funksional potensialının formalaşdırılması və inkişafı çərçivəsində təşkilati-idarəetmə prosedurları ilə bağlı 21 qayda hazırlanaraq təsdiq edilib.

İclasda qeyd olunub ki, görülən işlər sayəsində 2010-cu il ərzində monitorinq subyektləri tərəfindən MMX-yə ümumilikdə 51 749 məlumat daxil olub ki, bu məlumatların da 43 905-i cari əməliyyatlar, 7 844-ü isə şübhəli əməliyyatlar təşkil edib. Aparılan təhlillər nəticəsində 13 şübhəli əməliyyat barədə məlumat hüquq-mühafizə orqanlarına təqdim edilib.

İclası yekunlaşdıran A.Qasımov 2010-cu ili MMX-nin bütün istiqamətlər üzrə fəaliyyətini ümumilikdə müsbət qiymətləndirərək, struktur bölmələrin 2011-ci il üçün əsas prioritetləri iclas iştirakçılarının diqqətinə çatdırıb. A.Qasımov 2011-ci il üzrə müəyyən edilmiş prioritetlərin əsasını Xidmətin analitik potensialının əsaslı şəkildə gücləndirilməsi ilə, PL/TM ilə mübarizənin ölkəmizdə uğurla həyata keçirilən şəffaflığın artırılması, korrupsiyanın qarşısının alınması və milli təhlükəsizliyin gücləndirilməsi siyasəti ilə daha sıx şəkildə sinxronlaşdırılmasına nail olunmasının təşkil etdiyini bildirib.