Maliyyə

Ana səhifə

Maliyyə

Azərbaycan AYİB-in illik toplantısında iştirak edəcək

12 yanvar 2011 09:41 (UTC +04:00)

Bakı. Nicat Mustafayev – APA-Economics. Bu ilin may ayının 20-21-də Astanada (Qazaxıstan) Avropa Yenidənqurma və İnkişaf Bankının (AYİB) növbəti illik toplantısı keçiriləcək.

«APA-Economics»in məlumatına görə, toplantıda bankın üzvü olan ölkələrin AYİB üzrə rəhbərləri və digər yüksəkvəzifəli şəxslər iştirak edəcəklər. Azərbaycanı bu tədbirdə AYİB-in Azərbaycan üzrə rəhbəri, ölkənin iqtisadi inkişaf naziri Şahin Mustafayevin təmsil edəcəyi gözlənilir.

Ümumiyyətlə, iclasda Avropa Bankının fəaliyyətinin icmalına baxılacaq, həmçinin region iqtisadiyyatının böhrandan sonra bərpası və AYİB-in regionda həyata keçirdiyi əməliyyatlar müzakirə olunacaq.

Eyni zamanda, AYİB-in illik toplantısına paralel olaraq «Bazarların dəstəklənməsi – Asiya Avropa ilə görüşüb» adlı biznes-forum keçiriləcək. Forumda AYİB-in üzv ölkələrindən olan bir sıra şirkətlərin nümayəndələri iştirak edəcəklər.

Xatırladaq ki, AYİB-in illik toplantısı sonuncu dəfə Londonda (Böyük Britaniya) keçirilib.

Qeyd edək ki, Azərbaycan 1992-ci ildən AYİB-in üzvüdür. İndiyədək AYİB Azərbaycanda ümumi dəyəri 1,4 mlrd. ABŞ dolları olan 100-dən çox investisiya layihəsi imzalayıb. Bank əsas diqqətini dayanıqlı maliyyə sektorunun inkişaf etdirilməsinə, mikro, kiçik və orta sahibkarlığın dəstəklənməsinə və qeyri-neft özəl sektorun inkişaf etdirilməsinə yetirir. Dövlət sektorunda AYİB nəqliyyat, energetika, təbii sərvətlər və kommunal sahələrdə ümumi həcmi 567 mln. dollar olan 10 layihə maliyyələşdirib.