Maliyyə

Ana səhifə

Maliyyə

Banqkokda ACCU-ya üzv ölkələr üçün «Maliyyə savadlılığı» mövzusunda təlim kursları keçiriləcək

12 yanvar 2011 12:25 (UTC +04:00)

Bakı. Elnur Hüseynquluyev - APA-Economics. Bu ilin yanvar ayının 23-29-da Banqkokda (Tailand) Asiya Ölkələri Kredit İttifaqları Konfederasiyalarının Assosiasiyasına (ACCU) üzv ölkələrin nümayəndələri üçün “Maliyyə savadlılığı” mövzusunda təlim kursları keçiriləcək.

Bunu «APA-Economics»ə açıqlamasında Azərbaycan Kredit İttifaqları Assosiasiyasının (AKİA) İdarə Heyətinin sədri Elçin Bağırov bildirib.

E.Bağırovun sözlərinə görə, treninqin keçirilməsi ilə bağlı məlumatın AKİA-ya gec göndərilməsi, həmçinin maliyyə imkanları olmadığı üçün bu treninqdə Azərbaycanı təmsil edən şəxs olmayacaq.

Qeyd edək ki, 2010-cu il martın 17-də ACCU-nun İdarə Heyətinin Hindistanda keçirilən 69-cu illik toplantısında AKİA-nın bu quruma üzv olması barədə qərar qəbul edilib. ACCU 1971-ci il aprel ayının 28-də təsis edilib. Quruma Asiyanın 26 ölkəsinin 20,5 mln.-a yaxın üzvü olan 16 mindən çox kredit ittifaqlarına və 17 filial şəkilində fəaliyyət göstərən təşkilatlara xidmət göstərir. Baş qərargahı Banqkok şəhərində yerləşən təşkilatın əsas məqsədi Asiya ölkələrində yerləşən kredit ittifaqlarının cəmiyyətin sosial-iqtisadi inkişafında güclü fəaliyyət göstərməsinə və genişlənməsinə yardım göstərməkdən ibarətdir.

Xatırladaq ki, AKİA 2003-cü ildən fəaliyyət göstərir. Azərbaycanda fəaliyyət göstərən 79 kredit ittifaqından 70-i qurumun üzvüdür. Assosiasiyanın üzvü olan kredit ittifaqlarının 35-i kənd təsərrüfatının kreditləşməsində iştirak edir. Quruma kredit ittifaqları tərəfindən ödənilən rüblük üzvlük haqqı 100 manat, yeni qəbul edilən ittifaqlar üçün isə 30 manat təşkil edir.