Maliyyə

Ana səhifə

Maliyyə

«AXA MBASK» sığorta şirkəti ilə «Debüt Bank» arasındakı məhkəmə çəkişməsi davam edir

18 yanvar 2011 11:54 (UTC +04:00)

Bakı. Elnur Hüseynquluyev – APA-Economics. Azərbaycanın 1 saylı Bakı İnzibati-İqtisadi Məhkəməsi Mərkəzi Bank (AMB) tərəfindən lisenziyası dayandırılmış «Debüt Bank» ASC barədə qətnamə qəbul edib.

«AXA MBASK» sığorta şirkətindən «APA-Economics»ə verilən məlumata görə, məhkəmənin çıxardığı qətnaməyə əsasən, sığorta şirkəti tərəfindən depozit şəklində «Debüt Bank»a yatırılan vəsaitin (50 min manat) geri qaytarılması ilə bağlı bir ay ərzində tərəflər arasında razılıq əldə olunmalıdır: «Əks təqdirdə şirkət yenidən məhkəməyə müraciət etmək məcburiyyətində qalacaq».

Qeyd edək ki, sığorta şirkəti tərəfindən iddianın əsas mahiyyəti «Debut Bank»a yatırılan 50 min manatın geri qaytarılması olub. Proseslə bağlı sonuncu məhkəmə iclası yanvarın 13-də keçirilib.

Xatırladaq ki, minimum məcmu kapital tələbinə əməl etmədiyinə, bank qanunvericiliyinin tələblərini pozduğuna, o cümlədən idarəetməni və cari fəaliyyətini etibarlı və prudensial qaydada həyata keçirmədiyinə, habelə Azərbaycan Mərkəzi Bankının ardıcıl və davamlı göstərişlərinə riayət etmədiyinə görə 2010-cu il dekabr ayının 2-də AMB-nin İdarə Heyətinin qərarı ilə «Debüt Bank» ASC-yə və «Kövsər Bank» ASC-yə bank əməliyyatlarının aparılması üçün verilmiş lisenziyalar ləğv edilib. Həmin qərarla hər iki banka müvəqqəti inzibatçılar təyin edilib.

«MBASK» sığorta şirkəti 1992-ci ildən fəaliyyət göstərir. Şirkətin səhmdarları rolunda «AXA Group»un törəmə müəssisəsi olan «AXA Seguros Generales» (51%) və bir fiziki şəxs (49%) çıxış edir. Cari il yanvar ayının 1-nə şirkətin nizamnamə kapitalı 5,730 mln. manat təşkil edir. Hazırda şirkət 29 sığorta növü üzrə xidmət göstərir.

Təsisçisi bir neçə yerli fiziki şəxs olan «Debüt Bank» ASC isə 1994-cü ildən fəaliyyət göstərib. Bankın ölkə üzrə 7 filialı olub.