Maliyyə

Ana səhifə

Maliyyə

Azərbaycanda «İcbari sığortalar haqqında» qanun layihəsi parlamentin müzakirəsinə çıxarılıb

21 yanvar 2011 09:19 (UTC +04:00)

Bakı. Rəşad Süleymanov-APA-Economics. Bu gün Azərbaycan Milli Məclisi İqtisadi siyasət Komitəsinin iclası keçirilib. APA-nın məlumatına görə, iclasda çıxış edən komitənin sədri Ziyad Səmədzadə bildirib ki, qış sessiyasında Gömrük Məcəlləsi, Rəqabət Məcəlləsi, Tikinti Məcəlləsi, «İcbari sığortalar haqqında», «Təhsil kreditləri haqqında» qanun layihələri və bir sıra digər sənədlər müzakirəyə çıxarılacaq.

Daha sonra «İcbari sığortalar haqqında» qanun layihəsinə dair müzakirələr aparılıb. Komitə sədri Z.Səmədzadə bildirib ki, Azərbaycanda icbari sığorta sektoru kifayət qədər inkişaf etməyib: «Bu maraqlı və vacib qanundur. Burada vacib məsələlərlə yanaşı problemlər, sual doğuran məqamlar da var».

Maliyyə nazirinin müavini Azər Bayramov bildirib ki, qanun layihəsi 74 maddədən və iki hissədən ibarətdir. Ümumi hissədə qanunda verilən anlayışlar və onların izahı verilib. Xüsusi hissə fəsillərlə tətbiq olunan sığorta növləri barədədir. Qanunda dörd icbari sığorta növünün - daşınmaz əmlakın icbari sığortası (yanğınlar, partlayışlar, elektrikin qısaqapanmasından baş verən partlayışlar, texniki qəzalar, subasma, təbii fəlakətlər, üçüncü şəxslərin qəsdən etdiyi hərəkətlər və s.); nəqliyyat vasitələrinin mülki məsuliyyətinin icbari sığortası; daşınmaz əmlakın istismarı ilə bağlı mülki məsuliyyətin icbari sığortası; sərnişinlərin icbari fərdi qəza sığortasının tətbiqi təklif olunur.

«Bu gün nəqliyyat vasitələrinin mülki məsuliyyəti üzrə sığorta məbləği çox aşağıdır və formal xarakter daşıyır. Burada nəqliyyat vasitələrinin icbari sığortası ilə bağlı mərkəzi məlumat bazasının yaradılması nəzərdə tutulur. Avropa ölkələrində olduğu kimi sürücü 3-4 il sığorta ödəyir, bu müddətdə qəza törətmirsə, sığorta ödənişləri aşağı salınacaq, əks halda isə artırılacaq», - deyə A.Bayramov vurğulayıb.

Nazir müavini deyib ki, qanun qəbul olunandan sonra sərnişin daşıması ilə (şəhərdaxili və qəsəbədaxili sərnişindaşıma istisna olunmaqla) məşğul olan nəqliyyat vasitələrinin sahibləri daşıdıqları sərnişinləri fərdi qəza sığortası üzrə icbari sığorta etdirməlidir. Nəqliyyat vasitəsində olan hər bir sərnişinə görə sığorta məbləği 5 min manat təklif edilir.

Qanun layihəsində daşınmaz əmlakın istismarı ilə bağlı mülki məsuliyyətin sığortası üzrə sığorta məbləğləri də əksini tapıb. Belə ki fiziki şəxslərin sağlamlığına dəyən zərər üzrə ümumi sığorta ödənişi 50 min manatdan çox olmamaq şərti ilə, bir fiziki şəxsin sağlamlığına dəyən zərər üzrə 5 min manat, əmlaka dəyən zərərə görə 50 min manat təklif olunur. Layihədə həmçinin sığorta edənlərin, sığorta olunanların hüquq və vəzifələri, məsuliyyəti və s. əksini tapıb.

Daha sonra millət vəkilləri layihə ilə bağlı öz münasibətlərini bildiriblər. Qanun layihəsi təkliflər nəzərə alınmaqla parlamentin iclasına tövsiyə olunub.