Maliyyə

Ana səhifə

Maliyyə

Şahmar Mövsümov: «Azərbaycan Neft Fondunun hər manatına nəzarət olunur»

27 yanvar 2011 14:15 (UTC +04:00)

Bakı. Əli Əhmədov - APA-Economics. Mətbuatda Azərbaycan Dövlət Neft Fondunun fəaliyyətində qeyri-şəffaflığın olması və ya onun fəaliyyətinə nəzarətin zəif olması ilə bağlı səslənən fikirlər əsassızdır. «APA-Economics»in məlumatına görə, bunu Neft Fondunun icraçı direktoru Şahmar Mövsümov bu gün keçirdiyi mətbuat konfransında bəyan edib.

Ş.Mövsümovun sözlərinə görə, Fondun vəsaiti ilə həyata keçirilən layihələr üzrə nəzarət funksiyaları mövcuddur: «Neft Fondundan olan hər bir xərc mövcud qanunvericiliyə uyğun aparılır».

Fondun rəhbəri bildirib ki, ARDNF-nin vəsaitlərinin Dövlət Xəzinədarlığından kənar aparılması və ya Hesablama Palatasının onun fəaliyyətinə nəzarət etmək imkanının olmaması barədə deyilənlər də həqiqətə uyğun deyil: «Neft Fondundan xərclənən hər bir manat dövlət xəzinədarlığı vasitəsilə həyata keçirilir və orda əlbəttə ki, dövlət xəzinədarlığının nəzarəti mövcuddur. O ki qaldı Hesablama Palatasına, bildiyiniz kimi, palata dövlətin ali maliyyə orqanıdır və onun istənilən dövlət xərclərinə nəzarət həyata keçirmək hüququ var və o hüquqdan da istifadə edir».

İcraçı direktor bildirib ki, ötən il Neft Fondu Hesablama Palatasının auditindən keçib və bu zaman heç bir nöqsan aşkar edilməyib. Onun sözlərinə görə, Hesablama Palatası Neft Fondunun xətti ilə maliyyələşən istənilən layihəni də yoxlaya bilər. Məsələn, Oğuz- Qəbələ-Bakı su kəməri ilə bağlı layihə üzrə palata bu layihənin icraçısı olan «Azərsu» şirkətini yoxlaya bilər: «Yəni bununla bağlı səslənən bütün fikirlər həqiqətə uyğun deyil».