Maliyyə

Ana səhifə

Maliyyə

«Qarant Sığorta» şirkəti bu il daxilolmalarını 43% artırmaq niyyətindədir

27 yanvar 2011 14:47 (UTC +04:00)

Bakı. Elnur Hüseynquluyev – APA-Economics. Azərbaycanın «Qarant Sığorta» şirkəti 2011-ci il ərzində sığorta haqlarının həcmini 43% artıraraq 10 mln. manata çatdırmaq niyyətindədir. «APA-Economics»in məlumatına görə, bunu şirkətin İdarə Heyətinin sədri Vaqif Həsənov bildirib.

V.Həsənovun sözlərinə görə, məcmu sığorta haqları ilə yanaşı şirkətin fərdi satış sahəsi üzrə yığımlarının 92,3% artıraraq 2,5 mln. manata çatdırılması nəzərdə tutulub: «Bu il ərzində şirkət tərəfindən bazara yeni sığorta məhsulları da təqdim ediləcək. Belə ki, şirkət I rübdə bazara tibbi sığorta ilə bağlı yeni məhsul çıxaracaq. Bu məhsulu fərqləndirən əsas cəhətlərdən biri əhatə dairəsinə təkcə Azərbaycanın deyil, xaricə də aid olmasıdır. Bununla yanaşı şirkətin «50/50-yə» avtomobil sığortası məhsulu da təkmilləşdiriləcək».

V.Həsənov qeyd edib ki, bu ilki planlarda sığorta müqavilələrinin bağlanma müddətinin də azaldılacağı nəzərdə tutulub: «Aparılan dəyişiklər nəticəsində müqavilələrin dəyəri aşağı düşəcək. Bu isə şirkətin xərclərinin azaldılmasına gətirib çıxaracaq. Ümumiyyətlə, bu il şirkətimizi ciddi rəqabət gözləyir. Azərbaycan sığorta bazarına tanınmış xarici sığorta şirkətinin daxil olması ciddi rəqabətin olacağından xəbər verir».

Xatırladaq ki, təsisçisi «ZQAN Holding» Şirkətlər Qrupu olan «Qarant Sığorta» şirkəti 2007-ci ilin noyabr ayından fəaliyyət göstərir. Bu ilin əvvəlinə şirkətin nizamnamə kapitalı 4 mln. manat təşkil edib. Hazırda şirkət 18 könüllü və 4 icbari sığorta növü üzrə xidmət göstərir.