Maliyyə

Ana səhifə

Maliyyə

«Bank of Azerbaijan» 2010-cu ili mənfəətlə yekunlaşdırıb

28 yanvar 2011 11:43 (UTC +04:00)

Bakı. Elnur Hüseynquluyev – APA-Economics. «Bank of Azerbaijan» ASC-nin aktivlərinin həcmi 2011-ci il yanvar ayının 1-nə 146,861 mln. manat təşkil edib ki, bu da 2010-cu ilin əvvəlinə olan göstərici ilə müqayisədə 0,3% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 6,7% azalaraq 66,795 mln. manata, o cümlədən əhalinin əmanətləri 17,6% azalaraq 39,795 mln. manata, bankın kredit portfeli 12,1% artaraq 133,916 mln. manata, o cümlədən istehlak kreditlərinin həcmi 15,2% azalaraq 22,800 mln. manata çatıb. Bu müddət ərzində bankın məcmu kapitalı 35,3% azalaraq 11,854 mln. manat, o cümlədən nizamnamə kapitalı 57% artaraq 23,5 mln. manat təşkil edib.

Qeyd edək ki, ötən il ərzində bankın gəlirləri 3,4% artaraq 18,108 mln. manat, xərcləri isə 0,3% azalaraq 17,511 mln. manat olub. Nəticədə, bankın əldə etdiyi mənfəətin həcmi 596,405 min manat olub. Xatırladaq ki, 2009-cu ilin yekununda bankın zərəri 885,785 min manat təşkil edib.

Bu müddət ərzində bankın müştərilərinin sayı 0,80% azalaraq 14 843-ə, o cümlədən fiziki şəxslərin sayı 4,71% artaraq 13 265-ə, hüquqi şəxslərin sayı isə 32% azalaraq 2 307-yə çatıb. Həmçinin, aktiv plastik kartların sayı 36% artaraq 8 099, o cümlədən debet kartlarının sayı 35,9% artaraq 5 890 və kredit kartlarının sayı isə 35,8% artaraq 2 209 ədəd təşkil edib.

Xatırladaq ki, səhmdarları «NEM Holding» (1%) və iki fiziki şəxs (99%) olan «Bank of Azerbaijan» ASC 1993-cü ildən fəaliyyət göstərir. Cari ilin yanvar ayının 1-nə bankın 13 filialı, 28 bankomatı, 162 POS-terminalı və 279 işçisi mövcuddur.