Maliyyə

Ana səhifə

Maliyyə

«Kapital Bank» ötən il aktivlərini 42% artırıb

31 yanvar 2011 12:00 (UTC +04:00)

Bakı. Elnur Hüseynquluyev – APA-Economics. Azərbaycanın «Kapital Bank» ASC-nin aktivlərinin həcmi 2011-ci il yanvar ayının 1-nə 781,936 mln. manat təşkil edib ki, bu da 2010-cu ilin əvvəlinə olan göstərici ilə müqayisədə 42% çoxdur.

Bankın baş ofisindən «APA-Economics»ə verilən məlumata görə, hesabat ilində bankın kredit portfeli 54% artaraq 508,341 mln. manata, o cümlədən 12 ayadək verilmiş kreditlər 13% artaraq 263,899 mln. manata, 12 aydan artıq müddətə verilmiş kreditlər 2,5 dəfə artaraq 244,442 mln. manata çatıb. Bu müddət ərzində bankın ipoteka kreditlərinin ümumi həcmi 3% artaraq 18,551 mln. manat, o cümlədən Azərbaycan İpoteka Fondunun xətti ilə verilən kreditlərin həcmi 82,3% artaraq 11,642 mln. manat təşkil edib.

Təhlil olunan dövr ərzində bankın depozit portfeli 16% artaraq 291,196 mln. manat, o cümlədən əhalinin əmanətləri 13% ataraq 204,234 mln. manat, müddətli depozitlərin həcmi isə 54,2% artaraq 117,734 mln. manat olub.

Bununla yanaşı, bankın məcmu kapitalı 7,9% artaraq 69,973 mln. manata, o cümlədən nizamnamə kapitalı 25% artaraq 30 mln. manata çatıb.

Qeyd edək ki, ötən il ərzində bankın ümumi gəlirləri 15% artaraq 74,747 mln. manat, o cümlədən faiz gəlirləri 11% artaraq 36,488 mln. manat, qeyri-faiz gəlirləri isə 19,4% artaraq 38,259 mln. manat təşkil edib. Eyni zamanda, bankın cəmi xərcləri 19,3% artaraq 71,845 mln. manat, o cümlədən faiz xərcləri 9,4% artaraq 16,884 mln. manat, qeyri-faiz xərcləri 35,2% artaraq 34,460 mln. manat, PR və marketinq xərcləri isə 6,3% artaraq 20,501 mln. manat olub. Nəticədə, ötən il bankın mənfəəti 39,3% azalaraq 2,902 mln. manat olub.

Həmçinin, ötən il bankın müştərilərinin ümumi sayı 8,1% artaraq 101 368-ə, o cümlədən fiziki şəxslərin sayı 8,6% artaraq 86 811-ə, hüquqi şəxslərin sayı isə 5,4% artaraq 14 557-yə çatıb. Bu dövr ərzində bankın aktiv plastik kartlarının sayı 5,1% artaraq 2 027 309 təşkil edib.

Xatırladaq ki, «Kapital Bank» 2000-ci ildən fəaliyyət göstərir. Bankın səhmdarları rolunda «Paşa Holding» (97,5%) və bankın əmək kollektivi (2,5%) çıxış edir. Bankın ölkə üzrə 89 filialı, 388 bankomatı və 418 POS-terminalı var.