Maliyyə

Ana səhifə

Maliyyə

«AXA-MBASK» sığorta şirkətinə türkiyəli mütəxəssis rəhbərlik edəcək

01 fevral 2011 09:05 (UTC +04:00)

Bakı. Elnur Hüseynquluyev – APA-Economics. Azərbaycan Maliyyə Nazirliyi sığortaçıların rəhbər vəzifələrinə namizədlər üçün keçirdiyi test imtahanın nəticələrini açıqlayıb.

Maliyyə Nazirliyinin Dövlət Sığorta Nəzarəti Xidmətindən «APA-Economics»ə verilən məlumata görə, test imtahanında iştirak etmiş 15 nəfər rəhbər vəzifəyə namizəd olan şəxslərdən müvafiq qaydalara uyğun təqdim olunmuş 100 test sualının ən azı 70-nə düzgün cavab vermiş 13 iştirakçı, sığorta vasitəçiliyi fəaliyyətinə lisenziya almaq istəyən 45 nəfər fiziki şəxslərdən isə 21 nəfər imtahandan müvəffəqiyyətlə keçib.

Qeyd edək ki, nəticələrə görə, Yavuz Ölken («AXA-MBASK» sığorta şirkəti İdarə Heyətinin sədri vəzifəsinə namizəd), İqor Smaqa («Atəşgah Sığorta» şirkəti İdarə Heyətinin üzvlüyünə namizəd), Dilarə Babayeva («Paşa Həyat Sığorta» şirkəti İdarə Heyətinin üzvlüyünə namizəd) və Riad Əliyev («Azal Sığorta» şirkətinin baş mühasibi vəzifəsinə namizəd) imtahandan uğurla keçiblər.

Xatırladaq ki, imtahan «Sığorta fəaliyyəti haqqında» qanununun müvafiq maddəsinə və «Sığortaçıların rəhbər işçisi vəzifələrinə namizədlər və müvafiq sığorta vasitəçiliyi üzrə fəaliyyətə lisenziya almaq istəyən fiziki şəxslər üçün attestasiyanın təşkili və keçirilməsi Qaydaları»na uyğun keçirilib.