Maliyyə

Ana səhifə

Maliyyə

«United Credit Bank» ötən il xalis mənfəətini kəskin artırıb

01 fevral 2011 12:06 (UTC +04:00)

Bakı. Elnur Hüseynquluyev – APA-Economics. Azərbaycanın «United Credit Bank» ASC-nin aktivlərinin həcmi 2011-ci il yanvar ayının 1-nə 44,880 mln. manat təşkil edib ki, bu da 2010-cu ilin əvvəlinə nisbətən 7% çoxdur.

Bankın İdarə Heyətinin sədr müavini Vahid Əliyevin «APA-Economics»ə verdiyi məlumata görə, hesabat ilində bankın kredit portfeli 12% artaraq 32,660 mln. manata, o cümlədən istehlak kreditlərinin həcmi 16,4% artaraq 13,708 mln. manata çatıb. Təhlil olunan dövr ərzində bankın depozit portfeli 13,3% genişlənərək 16,281 mln. manat, o cümlədən müddətli depozitlər 22,6% artaraq 10,753 mln. manat, tələb olunanadək depozitlərin həcmi isə 1,2% azalaraq 5,527 mln. manat olub.

Bununla yanaşı, hesabat dövrünün sonuna bankın məcmu kapitalı 2,6% artaraq 13,869 mln. manat, o cümlədən nizamnamə kapitalı sabit qalaraq 12,108 mln. manat təşkil edib.

Qeyd edək ki, ötən il bankın gəlirləri 9,9% artaraq 5,983 mln. manat, o cümlədən faiz gəlirləri 7,6% artaraq 5,181 mln. manat, qeyri-faiz gəlirləri isə 27% artaraq 0,802 mln. manat olub. Həmçinin, bankın ümumi xərcləri 6% artaraq 5,669 mln. manata, o cümlədən faiz xərcləri 24% artaraq 2,452 mln. manat, qeyri-faiz xərcləri isə 5,3% azalaraq 3,217 mln. manata çatıb. Nəticədə, ötən il bankın mənfəəti 4,3 dəfə artaraq 0,314 mln. manat, xalis mənfəəti isə 8,2 dəfə artaraq 0,244 mln. manat təşkil edib.

Xatırladaq ki, təsisçisi yerli 1 hüquqi və 2 fiziki şəxs olan «United Credit Bank» ASC 1996-cı ildə «Rossiyskiy Kredit» Rusiya-Azərbaycan Kommersiya Bankı kimi yaradılıb və 1998-ci ildə brendini dəyişib. Cari ilin yanvar ayının 1-nə bankın 6 filialı, 5 bankomatı, 39 POS-terminalı və 118 işçisi mövcuddur.