Maliyyə

Ana səhifə

Maliyyə

Yanvarda Azərbaycanda 3,3 mln. manat ipoteka krediti verilib

03 fevral 2011 08:15 (UTC +04:00)

Bakı. Əli Əhmədov – APA-Economics. Bu ilin yanvar ayında Azərbaycan İpoteka Fondunun (AİF) vəsaitləri hesabına əhaliyə 3,3 mln. manat həcmində ipoteka krediti verilib. Bu barədə «APA-Economics»ə AİF-dən məlumat verilib. Bununla ipoteka kreditləşməsinin başlandığı 2006-cı ildən indiyədək Fondun xətti ilə verilən ipoteka kreditlərinin ümumi həcmi 251,4 mln. manata çatıb. Nəticədə, 2011-ci ilin fevralın 1-i vəziyyətinə Azərbaycanda adambaşına düşən ipoteka kreditlərinin həcmi 27,6 manata çatıb. Müqayisə üçün bildirək ki, yanvarın 1-də bu rəqəm 27,2 manat, 2010-cu ilin əvvəlində isə 17,4 manat olub.

Yanvarda AİF tərəfindən 5,2 mln. manatlıq kredit yenidən maliyyələşdirilib, bununla da uzun müddətdən bəri fondun ay ərzində təkrar maliyyələşdirdiyi kreditlərin həcmi həmin ay verilən kreditləri üstələyib. Ümumilikdə, indiyədək verilən ipoteka kreditlərinin 181,1 mln. manatı və ya 72,04 %-i təkrar maliyyələşdirilib.

Ötən ay AİF 13 mln. manatlıq istiqraz buraxıb. Ümumilikdə bu il fondun 60 mln. manatlıq istiqraz emissiyası yerləşdirəcəyi gözlənilir. İpoteka məqsədləri üçün dövlət tərəfindən ayrılan vəsaitlərin (sosial ipoteka üçün) həcmi isə 14 mln. manat olacaq.

AİF-in məlumatına görə, fevralın 1-nə ipoteka krediti alanların 41%-i 18-29 yaşında, 31%-i 30-35 yaşında, 28%-i isə 36 yaşdan yuxarı olanlardır.

Qeyd edək ki, AİF-in xətti ilə ipoteka kreditləri 20 müvəkkil kredit təşkilatı vasitəsilə verilir. İpoteka prosesində 12 sığorta, 10 qiymətləndirici şirkətin xidmətlərindən istifadə olunur. Adi ipoteka kreditləri maksimum məbləği 50 min manat, ilkin ödəniş 20% olmaqla, illik 8%-lə 25 illiyə verilir. Güzəştli (sosial) ipoteka kreditləri maksimum məbləği 35 min manat, ilkin ödəniş 15% olmaqla 30 illiyə, illik 4%-lə verilir.