Maliyyə

Ana səhifə

Maliyyə

«Bakı Sığorta» şirkəti bu il daxilolmalarını 50% artırmaq niyyətindədir

03 fevral 2011 12:20 (UTC +04:00)

Bakı. Elnur Hüseynquluyev – APA-Economics. Azərbaycanın «Bakı Sığorta» şirkəti 2011-ci ildə sığorta haqlarının həcmini ötən ilə nisbətən 50% artıraraq 4 mln. manata çatdıracağını proqnozlaşdırır. Bunu «APA-Economics»ə açıqlamasında şirkətin İdarə Heyətinin sədr müavini Mehman Əliyev bildirib.

M.Əliyevin sözlərinə görə, bu il toplanacaq sığorta haqlarının 30%-nin fərdi sığorta, 70%-nin isə korporativ müştərilərin payına düşəcəyi gözlənilir: «Ən çox sığorta haqqı «Avtonəqliyyat vasitələrinin sığortası» və «Əmlak sığortası» növləri üzrə toplanacaq. Bu il ərzində məcmu sığorta haqqının 20%-ni «Avtonəqliyyat vasitələrinin sığortası», 20%-ni isə «Əmlak sığortası» növləri təşkil edəcək».

M.Əliyev qeyd edib ki, şirkətin 2010-cu ildə 1,5 mln. manat həcmində əldə etdiyi mənfəətin tam həcmdə kapitallaşmaya yönəldilməsi planlaşdırılır. Belə ki, 2011-ci ildə şirkətin nizamnamə kapitalının 33% artırılaraq 6 mln. manata çatdırılması nəzərdə tutulub.

Qeyd edək ki, təsisçisi «Bank Respublika» ASC (51%) və digər yerli hüquqi və fiziki şəxslər olan «Bakı Sığorta» şirkəti 2007-ci ilin avqustundan fəaliyyət göstərir. Ötən il ərzində şirkətin topladığı sığorta haqlarının həcmi 2,59 mln. manat, sığorta ödənişləri isə 1,18 mln. manat olub.