Maliyyə

Ana səhifə

Maliyyə

Azərbaycan Hesablama Palatasında kollegiya iclası keçirilib

07 fevral 2011 11:58 (UTC +04:00)

Bakı. Nicat Mustafayev - APA-Economics. Azərbaycan Hesablama Palatasında 2010-cu ilin yekunlarına və 2011-ci ildə qarşıda duran vəzifələrə həsr olunmuş geniş kollegiya iclası keçirilib.

Palatadan «APA-Economics»ə verilən məlumata görə, Palatanın sədri Heydər Əsədov 2010-cu ilin yekunları barədə ətraflı çıxış edib.

İclasda həmçinin ölkədə qanunsuz yoxlamalara, rüşvətxorluğa və korrupsiyaya qarşı mübarizənin daha da gücləndirilməsinin, onun formal xarakter daşımamasının və hakimiyyət orqanlarının fəaliyyət prioritetlərindən biri kimi qəbul olunmasının, bu sahədə səmərəli nəzarət və hesabat sisteminin yaradılmasının zəruriliyi qeyd olunub. Palata sədri iclas iştirakçılarının diqqətini cəmiyyətin bütün təbəqələrində sosial inkişafın təmin edilməsi üçün vətəndaş-məmur əlaqələrinin daha da yaxşılaşdırılmasının vacibliyi, bu sahədə yol verilmiş nöqsanların görülmüş nəhəng işlərə xələl gətirməsi, vəzifədən sui-istifadə və korrupsiya hüquqpozmalarına şərait yaradan halların, əsassız yoxlamaların, vətəndaşların incidilməsinin, xüsusilə kiçik və orta sahibkarlığın inkişafına əngəl törədilməsinin yolverilməz olması və qarşısının bundan sonra da qətiyyətlə alınacağı barədə tapşırıqlarına yönəldərək Palatanın gələcək fəaliyyətində bu məsələlərə daha həssas yanaşılmasının və prioritet vəzifələrdən biri kimi qəbul edilməsinin vacibliyini bildirib.

Palatanın özəl sektorla təmasının olmamasına xüsusi nəzarət edilməsi barədə Palata rəhbərliyi tərəfindən verilmiş tapşırığa bundan sonra da ciddi əməl olunması, bir qayda olaraq nəzarət tədbirlərinin yalnız büdcə vəsaitlərindən istifadə edən təşkilatların fəaliyyətini əhatə etməsi, eyni zamanda müvafiq dövlət orqanları ilə birgə nəzarət tədbirlərinin keçirilməsinə üstünlüyün verilməsi bir daha əməkdaşların nəzərinə çatdırılıb, əvvəllər olduğu kimi gələcəkdə də Palatanın səyinin büdcə vəsaitlərindən səmərəli istifadə edilməsi üçün nəzarətin təşkili və aparılmasına yönəldilməsinin zəruriliyi qeyd olunub, bütün büdcə təşkilatlarının auditi üçün tələb olunan kadr və texniki imkanların məhdudluğuna baxmayaraq, Palatanın ötən ilki fəaliyyəti nəticəsində qurumun saxlanılması xərclərindən bir neçə dəfə çox vəsaitin büdcəyə bərpasının və səmərəsiz istifadə olunmasının qarşısının alınmasının təmin edildiyi vurğulanıb.

Çıxışının sonunda Palatanın sədri nəzarət tədbirlərinin gedişində, təşkilat və müəssisələrin əməkdaşları ilə təmaslarda INTOSAI-ın Lima Bəyannaməsinin və Etika Məcəlləsinin tələblərinə uyğun olaraq vətəndaşlarla münasibətdə yüksək mədəniyyət nümayiş etdirməyi, insanlara qarşı etik davranış qaydalarına ciddi riayət etməyi, xeyirxah, öz peşə fəaliyyətində dürüst və ədalətli olmağı, həmişə obyektivlik, peşəkarlıq göstərməyi, nöqsan və çatışmazlıqların, habelə korrupsiya elementlərinin aşkar olunduğu hallarda belə soyuqqanlılıqla, yalnız fakta və audit sübutlarına əsaslanmağı tapşırıb, Palatanın bundan sonra da ölkə prezidentinin korrupsiyaya qarşı mübarizənin səmərəliliyinin artırılması sahəsində fəaliyyətini var qüvvəsi ilə dəstəkləyəcəyini və həyata keçirilən bütün tədbirlərə imkan və səlahiyyətləri daxilində xidmət edəcəyini bildirib.