Maliyyə

Ana səhifə

Maliyyə

Azərbaycan Beynəlxalq Bankı istehlak kreditləşməsini artırıb

09 fevral 2011 09:18 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankının (ABB) aktivlərinin həcmi 2011-ci il yanvar ayının 1-nə 5 527,917 mln. manat təşkil edib ki, bu da ötən ilin əvvəlinə olan göstərici ilə müqayisədə 9% çoxdur.

ABB-nin baş ofisindən «APA-Economics»ə verilən məlumata görə, hesabat ilində bankın depozit portfeli 1,2% azalaraq 1 972,780 mln. manat, o cümlədən əhalinin əmanətləri 716,191 mln. manat, müddətli əmanətlər 521,752 mln. manat, tələb olunanadək depozitlər isə 194,439 mln. manat olub.

Həmçinin, bankın kredit portfeli il ərzində 3,9% azalaraq 3 760,812 mln. manata, o cümlədən istehlak kreditlərinin həcmi 12% artaraq 374,618 mln. manata çatıb. Bu müddət ərzində bankın məcmu kapitalı 2% artaraq 509,027 mln. manat, o cümlədən nizamnamə kapitalı sabit qalaraq 240 mln. manat təşkil edib.

Qeyd edək ki, ötən il bankın ümumi gəlirləri 6% artaraq 446,950 mln. manat, xərcləri isə 5,7% azalaraq 253,811 mln. manat olub. Nəticədə, 2010-cu ildə bankın mənfəəti 27% artaraq 193,139 mln. manat, xalis mənfəəti isə 48,854 mln. manat təşkil edib.

Xatırladaq ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Cari ilin yanvar ayının 1-nə bankın 37 filialı, 605 bankomatı, 2 932 POS- terminalı, 1 240 işçisi və 996 292 müştərisi olub.