Maliyyə

Ana səhifə

Maliyyə

Azərbaycanda bank əmanətləri son bir ildə 36% artıb

09 iyun 2011 12:35 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarında yerləşdirilmiş depozitlərin ümumi həcmi 2011-ci il mayın 1-nə 5 585,4 mln. manat təşkil edib ki, bu da 2010-cu ilin müvafiq dövrü ilə müqayisədə 972,6 mln. manat və ya 21,1% çoxdur. Bu ilin yanvar-aprel ayları ərzində məcmu depozitlərin həcmi 136,6 mln. manat və ya 2,5% artıb.

Azərbaycan Mərkəzi Bankından «APA-Economics»ə verilən məlumata görə, depozitlərin tərkibində ev təsərrüfatlarının depozitləri (əhalinin əmanətləri) 3 358,7 mln. manat, qeyri-maliyyə təşkilatlarının depozitləri isə 2 226,7 mln. manat təşkil edib. Beləliklə, depozitlərin strukturunda fiziki şəxslərin əmanətlərinin xüsusi çəkisi 60,1%-ə bərabər olub.

Əhalinin əmanətləri son bir ildə 884 mln. manat və ya 35,7%, hüquqi şəxslərin depozitləri isə 88,7% artıb. Göründüyü kimi, məcmu depozitlərin artımının 91%-i fiziki şəxslərin əmanətlərinin payına düşür. Bu vəziyyət bir tərəfdən əhali arasında bank sisteminə etibarlılığın yüksək səviyyədə qalmasını, digər tərəfdən isə bank kreditləşməsinin zəifləməsinin təzahürüdür. Belə ki, kreditləşmənin zəifləməsi şəraitində sahibkarlar öz vəsaitlərindən istifadə etmək məcburiyyətində qalır ki, nəticədə bank hesablarında olan vəsaitlərin həcmi azalır və ya çox kiçik templərlə artır.