Maliyyə

Ana səhifə

Maliyyə

Gürcüstan XİN: Rusiyanın ÜTT-yə üzvlüyü üçün irəli sürdüyümüz şərtlər qüvvədədir

13 iyun 2011 13:15 (UTC +04:00)

Bakı - APA-Economics. Gürcüstan Rusiyanın Ümumdünya Ticarət Təşkilatına (ÜTT) üzvlüyü üçün irəli sürdüyü şərtlərdən imtina etməyib. “APA-Economics”in “İnterfax”a istinadən xəbərinə görə, bunu Gürcüstan xarici işlər nazirinin müavini Nino Kalandadze bəyan edib.

“Bizim Rusiyaya qarşı müəyyən tələblərimiz var. İlk növbədə Abxaziya və Cənubi Osetiya məntəqələrində Gürcüstan-Rusiya sərhədi şəffaf olmalıdır. Tələblərimizə yenidən baxılmayacaq və bunu tərəfdaşlarımız da gözəl anlayırlar” - deyə N.Kalandadze bildirib.

Onun sözlərinə görə, Gürcüstan prezidenti Mixail Saakaşvilinin bu il iyunun əvvəlində Romada ABŞ-ın vitse-prezidenti Cozef Baydenlə görüşdə Rusiyanın ÜTT-yə üzvlüyünə heç bir şərt irəli sürmədən razılıq verməsi barədə məlumatlar həqiqətə uyğun deyil.

Qeyd edək ki, beynəlxalq ticarətin liberallaşdırılması və üzv ölkələrin siyasi-ticari münasibətlərinin tənzimlənməsi üçün yaradılan ÜTT hazırda 153 ölkəni özündə birləşdirir. Rusiyanın ÜTT-yə üzvlüyü üçün onların hər birinin razılığı tələb olunur. Bu səbəbdən Gürcüstanın vetosu Rusiyanın ÜTT-yə üzvlüyünü əngəlləyir. Rəsmi Tiflisin irəli sürdüyü əsas şərt isə Gürcüstanın tanınmamış Cənubi Osetiya və Abxaziya respublikalarında gömrük məntəqələrinə tam nəzarətə sahib olmaqdan ibarətdir. Moskva bu şərtə razılıq verməyəcəyi müddətdə Gürcüstan da Rusiyanın Ümumdünya Ticarət Təşkilatına üzvlüyünə maneələr yaradacaq.

Adətən, hansısa ölkənin ÜTT-yə üzvlüyü ilə bağlı danışıqlar 5-7 il çəksə də, Rusiya bu sahədə rekord göstəriciyə imza atıb - 17 il. Hazırda Rusiya bu beynəlxalq təşkilata üzv olmayan yeganə nəhəng iqtisadiyyatlı ölkədir.