Maliyyə

Ana səhifə

Maliyyə

Azərbaycan Maliyyə Nazirliyində geniş kollegiya iclası keçirilib

17 iyun 2011 09:45 (UTC +04:00)

Nazirliyin mətbuat xidmətindən «APA-Economics»ə verilən məlumata görə, kollegiyanın gündəliyinə Azərbaycanın 2011-ci il dövlət büdcəsinə yenidən baxılması ilə bağlı Maliyyə Nazirliyinin qarşısında duran vəzifələr, 2012-ci il dövlət və icmal büdcə layihələrinin hazırlanması işlərinin gedişi, Nazirliyin fəaliyyətində İKT və avtomatlaşdırılmış idarəetmə sistemləri, həmçinin elektron sənəd dövriyyəsi və elektron imza sistemlərinin geniş tətbiqi istiqamətində həyata keçirilən tədbirlər, Maliyyə Nazirliyinin aparatında, Nazirliyin strukturuna daxil olan dövlət agentlik və xidmətlərində, yerli maliyyə orqanlarında 2010-cu il və 2011-ci ilin 5 ayı ərzində kargüzarlığın təşkili, icra intizamının möhkəmləndirilməsi tədbirləri və daxil olan vətəndaş müraciətlərinə baxılması, Maliyyə Nazirliyi sistemində dövlət qulluğuna qəbulun vəziyyəti və mövcud problemlərlə bağlı məsələlər daxil edilib.

İclasda çıxış edən maliyyə naziri Samir Şərifov bildirib ki, artıq «2011-ci il dövlət büdcəsi haqqında» qanunda müvafiq dəyişikliklər edilib və sənəd dövlət başçısı tərəfindən imzalanıb: «Dəyişikliyin əsas mahiyyəti əhalinin sosial müdafiəsinin gücləndirilməsi tədbirlərinin həyata keçirilməsi, ilk növbədə pensiya təminatı sistemində islahatların davam etdirilməsi, dövlət büdcəsindən maliyyələşən təşkilatlarda çalışanların əmək haqlarının artırılması, sosial müavinətlər, təqaüdlər və digər sosial ödənişlər, habelə bir sıra sosial və infrastruktur təyinatlı investisiya layihələrinin maliyyələşdirilməsi üçün əlavə maliyyə təminatının yaradılması olub. Qeyd olunan xərclər üzrə tələb olunan 3 193,2 mln. manat həcmində maliyyə təminatının yaradılması üçün 2011-ci il dövlət və icmal büdcələrinin gəlirlərinin artımı istiqamətində müvafiq dəyişikliklər edilib».

Nazir 2011-ci il dövlət büdcəsinə yenidən baxılması ilə Maliyyə Nazirliyinin qarşısında duran vəzifələrin vaxtında və keyfiyyətlə icra olunması ilə bağlı Nazirliyin aparatının aidiyyəti struktur bölmələrinə, dövlət xidmət və agentliklərinə, yerli maliyyə orqanlarına konkret tapşırıqlar verib.

İclasda həmçinin qeyd olunub ki, aprel ayından Nazirliyin bir sıra xəzinədarlıq idarələrində xəzinədarlığın idarə edilməsinin avtomatlaşdırılmış informasiya sistemi tətbiq edilib və sistemin 2011-ci il ərzində daha da genişləndirilməsi qərara alınıb. Dövlət Xəzinədarlığı Agentliyinin tam avtomatlaşdırılması büdcə vəsaitlərinin xərclənilməsi prosesinə şəffaflıq gətirməklə yanaşı, büdcə əməliyyatlarının icrasının sürətini və keyfiyyətini artıracaq. Müzakirələr zamanı yerli maliyyə orqanlarının mərkəzi aparatın rəqəmsal avtomatlaşdırılmış telefon stansiyası və daxili kompüter şəbəkəsi ilə əlaqələndirməsinə və onun əsasında Nazirliyin vahid daxili telekommunikasiya sistemini yaradılmasına dair təkliflər verilib.

Dövlət qulluğunda olmanın yaş həddi ilə bağlı «Dövlət qulluğu haqqında» qanunda edilmiş dəyişikliklərin tətbiqi barədə məsələlərin müzakirəsi zamanı isə, həmin qanunun icrası istiqamətində zəruri tədbirlərin görülməsi, Nazirliyin vahid sistemi üzrə müvafiq vəzifə tutan dövlət qulluqçularının yaş həddi ilə əlaqədar dövlət qulluğuna xitam verilməsi və ya çalışma müddətinin uzadılması ilə bağlı məsələlərin araşdırılması və qeyd olunan halların tənzimlənməsi məqsədilə daxili prosedur qaydaların hazırlanması Nazirliyin aidiyyəti struktur bölmələrinə, dövlət xidmət və agentliklərinin, yerli bölmələrin və tabeliyində olan digər qurumların rəhbərlərinə tapşırılıb.

Kollegiyada bəzi rayon, şəhər maliyyə orqanları tərəfindən dövlət büdcənin yerli gəlir və xərclərinin tərtibi prosesində, kargüzarlıq və xəzinə əməliyyatlarının aparılmasında, o cümlədən hesabat və məlumatların vaxtında və keyfiyyətlə Nazirliyə təqdim olunmasında bir sıra nöqsanlara yol verildiyi qeyd olunub. Bəzi rayon, şəhər maliyyə orqanlarının rəhbərlərinə yerlərdə olan bəzi çatışmazlıqların aradan qaldırılması ilə bağlı müvafiq tapşırıqlar verilib.

Kollegiya iclasının yekununda müzakirə edilən məsələlərlə bağlı qərarlar qəbul edilib.