Maliyyə

Ana səhifə

Maliyyə

Azərbaycan parlamenti “İcbari sığortalar haqqında” qanun layihəsinin sonuncu oxunuşda müzakirəsinə hazırlaşır

17 iyun 2011 10:53 (UTC +04:00)

Bakı. Rəşad Süleymanov - APA-Economics. Bu gün Azərbaycan Milli Məclisinin İqtisadi siyasət və Sosial siyasət komitələrinin birgə iclası keçirilib. “APA-Economics”in xəbərinə görə, iclasda “İcbari sığortalar haqqında” qanun layihəsi üçüncü oxunuşda müzakirə olunub.

İqtisadi siyasət komitəsinin sədri Ziyad Səmədzadə bildirib ki, qanun layihəsi üzrə Milli Məclisdə İqtisadi siyasət komitəsinin sədr müavini Çingiz Əsədullayevin rəhbərliyi ilə yaradılmış işçi qrup Maliyyə Nazirliyi və digər qurumlarla iş aparıb.

Maliyyə nazirinin müavini Azər Bayramov layihəyə dəyişikliklərlə bağlı məlumat verib. Bildirib ki, 78 maddədən ibarət qanun layihəsində icbari sığortanın prinsipləri ayrıca əksini tapıb, İcbarı Sığorta Bürosunun təşkili, qiymətləndirmə, evlərin və mənzillərin sığortalanması, deputatlar tərəfindən qaldırılmış sığorta ödənişlərinin alınmasının sadələşdirilməsi ilə bağlı bir sıra məsələlər əksini tapıb.

A.Bayramov qeyd edib ki, əvvəl varislərin sığorta ödənişlərini alması bir neçə ay çəksə də, qanun qəbul edildikdən sonra varis ailə üzvü olması barədə sənəd təqdim etməklə bunu daha tez alacaq.

Qanun layihəsində daşınmaz əmlakın, avtonəqliyyat vasitələrinin, sərnişinlərin icbari fərdi qəza sığortası və s. əksini tapıb. Yaşayış evləri və mənzillərin icbari sığortası üzrə sığorta məbləğləri və azadolmaların məbləğləri təyin olunub. Bakı şəhərində yerləşən daşınmaz əmlak üzrə sığorta məbləği 25 min manat, azadolma məbləği 250 manat, Gəncə, Sumqayıt və Naxçıvanda müvafiq olaraq 20 min manat və 200 manat, digər yaşayış məntəqələrində müvafiq olaraq 15 min manat və 150 manat təklif olunub.

Daha sonra qanun layihəsi müzakirə olunub və parlamentin plenar iclasına tövsiyə edilib.