Maliyyə

Ana səhifə

Maliyyə

Azərbaycanın gəlirləri üzrə mənfi saldo kəskin artıb

17 iyun 2011 13:08 (UTC +04:00)

Bakı. Vahab Rzayev – APA-Economics. Azərbaycanın 2011-ci ilin I rübü üzrə tədiyyə balansında əks olunan gəlirlər üzrə daxilolmaların və ödənişlərin ümumi dövriyyəsi 1 699,7 mln. ABŞ dolları təşkil edib. Azərbaycan Mərkəzi Bankından «APA-Economics»ə verilən məlumata görə, bunun 1 523,4 mln. dolları və ya 89,6%-i Azərbaycandan aparılan ödənişlər, 176,3 mln. dolları və ya 10,4%-i ölkəyə gəlirlərlə bağlı olan daxilolmaların payına düşüb.

Beləliklə, 2011-ci ilin I rübü üzrə gəlirlər üzrə tədiyyə balansında 1 347,1 mln. dollar məbləğində mənfi saldo yaranıb ki, bu da əvvəlki ilə nisbətən 69,4% çoxdur. Qeyd edək ki, ümumilikdə gəlirlər üzrə Azərbaycandan həyata keçirilən ödənişlərin həcmi ölkəyə daxil olan ödənişləri 8,6 dəfə üstələyib.

Azərbaycandan aparılan ödənişlərin əsas hissəsini (1 311,7 mln. dollar) beynəlxalq neft-qaz konsorsiumlarının xarici investorlarının payına düşən gəlirlərin repatriasiyası (əsasən xam neft şəklində), qeyri-rezidentlərə ödənilmiş əmək haqları (29,3 mln. dollar) və xarici kreditlərdən istifadəyə görə ödənilən faizlər (34,6 mln. dollar) təşkil edib.

Ümumilikdə isə gəlirlər üzrə mənfi saldonun 1 329,8 mln. dolları və ya 98,7%-i neft-qaz sektoru, 17,4 mln. manatı və ya 1,3%-i isə digər sahələrin payına düşüb. Neft-qaz sektoru üzrə ödənişlər daxilolmaları 579 dəfə üstələyib (ödənişlər 1 332,1 mln. dollar, daxilolmalar 2,3 mln. dollara bərabər olub). Digər sahələr üzrə həmin nisbət 1,1 dəfədir (ödənişlər - 191,3 mln. manat, daxilolmalar - 174 mln. manat).