Maliyyə

Ana səhifə

Maliyyə

«Unibank» yeni depozit kampaniyasına başlayıb

04 iyul 2011 14:53 (UTC +04:00)

Bakı. Elnur Hüseynquluyev – APA-Economics. Azərbaycanın «Unibank» ASC 12 ay və daha artıq müddətə milli valyutada yerləşdirilən əmanətlərin sahibləri üçün «Hər kəsə hədiyyə +1%» kampaniyasına start verib.

Bankın baş ofisindən «APA-Economics»ə verilən məlumata görə, artıq bankın «Müddətli», «Proqressiv», «Faizlər əvvəlcədən» və «Yığım» əmanətləri üzrə bir il və ya daha çox müddətə 200 manatdan 50 min manatadək vəsait yerləşdirən bütün müştəriləri cari faiz dərəcələri üzrə əlavə 1% bonus alacaqlar.

Nəticədə, Azərbaycan manatı ilə müddətli depozitlər üzrə bankın maksimal faiz dərəcəsi yenidən illik 13%-ə çatıb. Əvvəl olduğu kimi, bütün əmanətçilər yerləşdirdikləri depozitin 90%-dək məbləğində imtiyazlı şərtlərlə kredit xəttindən istifadə edə bilər. Əmanətlərin məbləğindən asılı olaraq, müştərilər həmçinin pulsuz «Visa» və «MasterCard» plastik kartları almaq hüququna malikdir.

Xatırladaq ki, cari ildə «Unibank»da depozitlərin minimal məbləğinə tələblər əhəmiyyətli dərəcədə endirilib. Belə ki, «Müddətli» depoziti üzrə ilkin məbləğ 500 manat, «Proqressiv» əmanəti üzrə isə minimal hədd 200 manatadək endirilib.

Qeyd edək ki, «Unibank» ASC 1992-ci ildən fəaliyyət göstərir. Hazırda bankın 24 filialı mövcuddur.