Maliyyə

Ana səhifə

Maliyyə

Azərbaycan və Almaniya arasında ticarət dövriyyəsi 70% artıb

05 iyul 2011 09:44 (UTC +04:00)

Bakı. Əli Əhmədov – APA-Economics. İndiyədək Almaniya şirkətləri Azərbaycana 200 mln. avrodan artıq həcmə sərmayə yatırıb. «APA-Economics»in məlumatına görə, bu barədə İqtisadi İnkişaf Nazirliyi Aparatının rəhbəri Samir Vəliyev bildirib. Onun sözlərinə görə, hazırda alman şirkətləri Azərbaycanın energetika, inşaat, kənd təsərrüfatı, xidmət və maliyyə sahələrində uğurla fəaliyyət göstərir.

İndiyədək Almaniya hökuməti bu ölkənin KfW bankı vasitəsilə Azərbaycanda müxtəlif layihələrin icrasına 372 mln. avro həcmində kredit ayırıb. Bu kreditlər əsasən infrastruktur layihələri, o cümlədən su təchizatının yaxşılaşdırılması, energetika və s. sahələrə yatırılıb.

S.Vəliyev bildirib ki, bu ilin mayında Nazirliyin nümayəndə heyətinin Almaniyaya səfəri zamanı bu ölkənin Federal İqtisadiyyat və Texnologiyalar Nazirliyi ilə yüksək səviyyəli ticarət və investisiya üzrə işçi qrupunun yaradılması barədə memorandum imzalanıb. Bu işçi qrupunun iclasları çərçivəsində cari məsələlər, əgər problemlər varsa, onların həlli yolları və yeni əməkdaşlıq istiqamətləri müzakirə olunacaq.

Bu gün Bakıda keçirilən ikitərəfli biznes forumda Almaniyanın 16 şirkətinin 20 nümayəndəsi iştirak edib, onlar sənaye, maşınqayırma, kənd təsərrüfatı, inşaat, energetika və konsaltinq sahələrində fəaliyyət gstərir.

Forumdan sonra iki ölkənin iş adamları arasında görüşlər keçirilib. Sabah isə almaniyalı sahibkarların iştirakı ilə dəyirmi masanın keçirilməsi nəzərdə tutulur, eləcə də bir sıra yerli sənaye müəssisələri və Sumqayıt şəhərinə səfərləri planlaşdırılır ki, qonaqlar müəssisələrin imkanları ilə yerində tanış olacaq və əməkdaşlıq perspektivləri barədə danışıqlar aparacaqlar.

Forumda bildirilib ki, iki ölkə arasında ticarət dövriyyəsi ilbəil artır. Belə ki, 2011-ci ilin yanvar-may aylarında qarşılıqlı ticarət dövriyyəsinin həcmi 600 mln. dollardan artıq və ya ötən ilkindən 68% çox olub. S.Vəliyevin sözlərinə görə, bu böyük rəqəm deyil: «Yəni, ölkələrin real iqtisadi potensialını əks etdirmir. Belə tədbirlərin əhəmiyyəti də ondan ibarətdir ki, ticarət əlaqələri artır».

Almaniyadan ixracın əsas hissəsini maşınqayırma məhsulları təşkil edir, Azərbaycan isə bu ölkəyə əsasən kənd təsərrüfatı və neft məhsulları ixrac edir.