Maliyyə

Ana səhifə

Maliyyə

Azərbaycanda aqrar sektorunda sığorta potensialı 100 mln. manatdır

12 iyul 2011 14:53 (UTC +04:00)

Bakı. Elnur Hüseynquluyev - APA-Economics. Azərbaycanda kənd təsərrüfatı sektorunda potensial sığorta yığımlarının həcmi 100 mln. manat həcmindədir. Bu barədə «APA-Economics»ə açıqlamasında «Başak İnam» sığorta şirkətinin İdarə Heyətinin sədri Orxan Həsənov bildirib.

O.Həsənovun sözlərinə görə, bu sahədə perspektivlər çox böyükdür və buraya heyvandarlıq, quşçuluq bitkiçilik, istixanalar və digər kənd təsərrüfatı sahələrinin sığortası daxildir: «Lakin bu bizim üçün çox əziyyətli işdir. Çünki bu sığorta sahəsi üzrə şirkət xarici praktikaya - sistemə uyğunlaşa bilmir. Bu sahənin sığorta işini aparmaq üçün tam və işlək sistem yaratmaq lazım gəlir. Həmçinin qeyd edim ki, risk baxımından təkrarsığorta məsələsi həll edilib. Kənd təsərrüfatı sahəsinin sığortası daha riskli olsa da, şirkət risklərin 75%-ni Türkiyənin «Groupama» şirkətinə ötürəcək».

O.Həsənov Azərbaycanda kənd təsərrüfatı sahəsinin sığortalanması, həmçinin bu sahə üzrə bazarın mövcud vəziyyətinin, eyni zamanda bazara yeni sığorta məhsullarının çıxarılması ilə bağlı Dünya Bankının nümayəndələri ilə müzakirələr aparıldığını qeyd edib.

Qeyd edək ki, səhmdarları Fransanın «Groupama» (49%), «Turanbank» ASC (15%), «Azər-Türk Bank» (10%), «Aqrarkredit» bank olmayan kredit təşkilatı (1,2%) və fiziki şəxslər (24,8%) olan «Başak İnam» sığorta şirkəti 1996-cı ildən fəaliyyət göstərir. Cari ilin iyul ayının 1-nə şirkətin nizamnamə kapitalının həcmi 3,2 mln. manat təşkil edir. Şirkət müştərilərə 4 icbari və 27 könüllü sığorta növü üzrə xidmət göstərir.