Maliyyə

Ana səhifə

Maliyyə

«Xalq Bank» «Xalq Əmanəti» seriyasından dördüncü nəşrini təqdim edib

02 sentyabr 2011 16:30 (UTC +04:00)

Bakı. Elnur Hüseynquluyev - APA-ECONOMICS. Azərbaycanın «Xalq Bank» ASC bu gün «Xalq Əmanəti» seriyasının dördüncü buraxılışını təqdim edib.

«APA-ECONOMICS»in məlumatına görə, bankın maliyyə dəstəyi ilə həyata keçirilən “Xalq Əmanəti” layihəsinin növbəti nəşri Azərbaycanın xalq şairi Hüseyn Arifin (1924-1992) yaradıcılığına həsr olunub.

Tədbirdə çıxış edən Azərbaycan Atatürk Mərkəzinin rəhbəri, Milli Məclisin üzvü Nizami Cəfərov Hüseyn Arifin yaradıcılığından söz açıb, onun Azərbaycan ədəbiyyatının inkişafındakı rolundan danışıb. O, «Xalq Bank»ın sözügedən layihəsini yüksək qiymətləndirdiyini vurğulayıb.

Xatırladaq ki, «Xalq Bank» 2010-cu ildən başlayaraq xalqın mədəni irsinin qorunub gələcək nəsillərə ötürülməsi, mənəvi dəyərlərin dünyaya tanıdılması məqsədilə «Xalq Əmanəti» mədəniyyət layihəsini həyata keçirir. Bu layihə çərçivəsində Azərbaycanın görkəmli ədəbiyyat, incəsənət və elm xadimlərinin əsərləri, eləcə də folklor nümunələri nəfis tərtibatda nəşr olunub. Layihə çərçivəsində Azərbaycanın xalq rəssamı Böyükağa Mirzəzadə, xalq şairi Məmməd Araz və Azərbaycanın ilk peşəkar qadın rəssamı Maral Rəhmanzadənin həyat və yaradıcılığına həsr olunan nəşrlər geniş oxucu auditoriyası tərəfindən rəğbətlə qarşılanıb.

«Xalq Əmanəti» seriyasından olan kitablar hədiyyəlikdir, bu nəşrlər ölkənin ali və orta təhsil müəssisələrinə, uşaq evləri və kitabxanalara, müxtəlif fondlara, dövlət müəssisələrinə, xarici ölkələrin Azərbaycandakı və Azərbaycanın xaricdə fəaliyyət göstərən səfirlik və konsulluqlarına, eləcə də sənətsevərlərə hədiyyə olunur.

Qeyd edək ki, təsisçisi bir neçə hüquqi şəxs olan «Xalq Bank» ASC 2004-cü ildən fəaliyyət göstərir.