Maliyyə

Ana səhifə

Maliyyə

Azərbaycanın fond bazarında canlanma müşahidə olunur

06 sentyabr 2011 10:34 (UTC +04:00)

Bakı. Nicat Mustafayev – APA-Economics. Bu ilin ilk yarısında Azərbaycanın fond bazarında dövlət qiymətli kağızlar seqmentinin artım tempi korporativ qiymətli kağızlar sektorunun artım tempini bir neçə dəfə üstələyən dinamika nümayiş etdirib.
Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, hesabat dövründə dövlət qiymətli kağızlar bazarının artım tempi korporativ qiymətli kağızlar bazarının artım tempindən 3,4 dəfə çox olub və dövlət qiymətli kağızlar bazarı ötən ilin müvafiq dövrü ilə müqayisədə 5,1 dəfə artaraq 3,417 mlrd. manat təşkil edib.
«Hesabat dövründə dövlət istiqrazları bazarının həcmi, əməliyyatların sayı və gəlirliyində artım müşahidə olunub. Belə ki, ötən ilin müvafiq dövrü ilə müqayisədə dövlət istiqrazlarının ilkin və təkrar bazarının həcmində 4%, əməliyyatların sayında isə 62% artım baş verib. Bir aylıq dövlət istiqrazlarının gəlirlik səviyyəsi ilin əvvəlindən 1,36%-dən hesabat dövrünün sonunadək 1,46%-ə, 3 aylıq dövlət istiqrazlarının gəlirlik səviyyəsi 1,61%-dən 2,3%-ə, 6 aylıq dövlət istiqrazlarının gəlirlik səviyyəsi 2,01%-dən 2,99%-ə artıb, bir illik geriçağrılabilən dövlət istiqrazlarının orta gəlirlik səviyyəsi isə 4% təşkil edib. Cari ilin yanvar-iyun ayları ərzində dövlət istiqrazlarının gəlirliklərinin bazar siqnalları əsasında müəyyənləşməsi məntiqli gəlirlik əyrisinin formalaşması ilə nəticələnib», - deyə QKDK-dan bildirilib.
Komitədən həmçinin bildirilib ki, pul siyasətinin neytrallaşdırılması ilə Azərbaycan Mərkəzi Bankının (AMB) notlarının həcmi və gəlirliyində əhəmiyyətli artım müşahidə olunub. Belə ki, 2011-ci ilin 6 ayı ərzində AMB-nın notlarının ilkin bazarı ötən ilin müvafiq dövrü ilə müqayisədə 4,4 dəfə, təkrar bazarı isə 2,7 dəfə artıb, ümumi əməliyyatların həcmi isə 492 mln. manat təşkil edib: «Cari ilin əvvəlindən I rübün sonunadək notların orta gəlirliyinin azalması tendensiyasının davam etməsinə baxmayaraq, II rüb ərzində notların orta gəlirliyində 1,3 dəfə artım baş verib. Bu da öz növbəsində bazarda notlara olan tələbatın artmasına və əməliyyatların dinamikasına müsbət təsir göstərib».
Dövlət qiymətli kağızlar bazarı

Qiymətli kağızların növləri	Yanvar-iyun, 2011		Yanvar-iyun, 2010		Dinamika (%)
Qiymətli kağızların növləri	Əqdlərin sayı	Məbləğ (manatla)	Əqdlərin sayı	Məbləğ (manatla)	Dinamika (%)
Dövlət qiymətli kağızları	905	3 417 856 602	553	665 117 859	5,1 dəfə
Dövlət istiqrazları	123	194 093 856	76	186 636 438	4,0%
Dövlət istiqrazları (ilkin yerləşdirmə)	103	173 869 169	43	111 314 128	56,2%
Dövlət istiqrazları (təkrar bazar)	20	20 224 688	33	75 322 359	-73,1%
Mərkəzi Bankın notları	177	492 009 046	98	111 988 456	4,4 dəfə
Mərkəzi Bankın notları (ilkin yerləşdirmə)	172	482 453 358	97	108 515 801	4,4 dəfə
Mərkəzi Bankın notları (təkrar bazar)	5	9 555 688	1	3 472 655	2,7 dəfə
Repo/Əks-repo	605	2 731 753 700	379	366 492 916	7,4 dəfə
Dövlət istiqrazları (repo/əks-repo)	9	7 299 536	14	16 492 988	-55,7%
Mərkəzi Bankın notları (repo/əks-repo)	596	2 724 454 164	365	349 999 928	7,8 dəfə