Maliyyə

Ana səhifə

Maliyyə

Azərbaycana cəlb edilən xarici kapitalın həcmi 6% artıb

15 sentyabr 2011 12:15 (UTC +04:00)

Bakı. Vahab Rzayev – APA-Economics. Azərbaycanın 2011-ci ilin yanvar-iyun ayları üzrə tədiyyə balansında əks olunmuş xaricdən cəlb olunan kapitalın ümumi məbləği 4 mlrd. dollar təşkil edib ki, bu da əvvəlki ilin müvafiq dövrünün analoji göstəricisindən 6,2% çoxdur.

Azərbaycan Mərkəzi Bankından «APA-Economics»ə verilən məlumata görə, bu göstərici əsasən ölkəyə cəlb olunmuş birbaşa investisiyalar və xarici kreditlər hesabına formalaşıb:

(mln. dollar)

Cəlb olunan xarici kapitalın strukturu
	2010-ci il, 6 ay	2011-ci il, 6 ay
Birbaşa investisiyalar	1 460,1	2 000,5
- neft-qaz sektoru	1 175,1	1 583,4
- digər sektorlar	285,0	417,1
Kreditlər və digər investisiyalar	2 309,4	2 001,4
- dövlət təminatlı kreditlər	321,5	607,3
- dövlət təminatlı olmayan kreditlər	1 233,8	1 165,3
-- neft-qaz sektoru	179,0	402,6
-- banklar	955,8	476,4
-- digərləri	98,9	286,3
- digər investisiyalar	754,1	228,8
CƏMİ	3 769,5	4 001,9

Mərkəzi Bankın tədiyyə balansının şərhində deyilir ki, birbaşa investisiyalar formasında xaricdən cəlb olunmuş sərmayələrin ümumi həcmi 2 mlrd. dollar olub ki, bu investisiyaların strukturunda neft-qaz sektorunun xüsusi çəkisi 79,2% təşkil edib. Kreditlər və digər investisiyalar formasında cəlb olunmuş sərmayələrin həcmi 13,3% azalıb, onların xarici kapitalın strukturunda xüsusi çəkisi isə 11,3 faiz bəndi azalaraq 50% təşkil edib. Cədvəldən göründüyü kimi, azalma əsasən banklar tərəfindən cəlb edilmiş kreditlər və digər investisiyalar hesabına formalaşıb.

Tədiyyə balansına əsasən, əvvəlki dövrlərdə cəlb olunmuş kreditlər üzrə 1 182,1 mln. dollar miqdarında vəsait geri qaytarılıb. Qaytarılmış kreditlərin 50%-i (590,8 mln. dollar) bank sistemi, 10,5%-i (124,1 mln. dollar) dövlət və dövlət təminatı əsasında cəlb olunmuş kreditlər, 24,4%-i (288,0 mln. dollar) neft-qaz sektoru, 15,1%-i (179,2 mln. dollar) isə digər müəssisələr və firmaların payına düşür.