Maliyyə

Ana səhifə

Maliyyə

Azərbaycanda sublizinq xidmətlərinin tətbiqində problemlər mövcuddur

03 oktyabr 2011 12:45 (UTC +04:00)

Bakı. Elnur Hüseynquluyev – APA-Economics. Azərbaycanda sublizinq xidmətlərinin tətbiqi, həmçinin məhsulun müvəqqəti idxalı ilə bağlı müəyyən problemlər mövcuddur. Bunu «APA-Economics»ə açıqlamasında «AtaLeasing» şirkəti İdarə Heyətinin üzvü Cavid Abbasov bildirib.

C.Abbasovun sözlərinə görə, mövcud qanunvericiliyə əsasən, müştəriyə sublizinq xidmətinin göstərilməsi üçün məhsulun müvəqqəti idxalı 1 il üçün nəzərdə tutulub. «Yazılı ərizə ilə bu müddəti iki ilədək artırmaq mümkündür. Lakin şirkət müştərilərlə lizinq müqavilələrini 3-4 il müddətinə bağladıqda ortaya ciddi problem çıxır. Bu problemlərin həlli üçün «AtaLeasing» şirkəti müvafiq dövlət qurumları ilə görüşlər keçirir və problemin mümkün həlli yollarını müzakirə edir», - deyə C.Abbasov bildirib.

Qeyd edək ki, Azərbaycanda fəaliyyət göstərən lizinq şirkətləri əsasən iki lizinq növündən – maliyyə lizinqi və sublizinqdən istifadə edir.

Maliyyə lizinqi - lizinqin ən geniş yayılan formasıdır. Maliyyə lizinqində avadanlığın uzunmüddətli icarəyə verilməsi və müqavilə müddətinin sonunda bu avadanlığın müqavilədə əvvəlcədən nəzərdə tutulmuş simvolik bir dəyərlə lizinqalana satılması nəzərdə tutulur.

Maliyyə lizinqi daha çox bir maliyyələşdirmə növüdür və müştəri tərəfindən seçilən avadanlığın lizinq şirkəti tərəfindən yalnız satın alınmasından ibarətdir.

Sublizinqdə isə lizinqə götürülən avadanlıq lizinq şirkətinin (lizinqverənin) razılığı ilə lizinqalan tərəfindən digər müəssisələrə yenidən lizinqə verilə bilər. Bu zaman sublizinq müqaviləsinin müddəti əsas lizinq müqaviləsinin müddətindən çox ola bilməz. Sublizinq müqavilələrinin şərtləri də hər cəhətdən maliyyə lizinqi müqavilələrinin şərtlərinə bənzəyir.

Bundan başqa, operativ lizinq növü də mövcuddur. Lizinqin bu növündə, maliyyə lizinqi ilə müqayisədə müqavilə müddəti daha qısamüddətli, lizinq ödənişləri isə daha yüksək olur. Bu lizinq növündə lizinq şirkəti avadanlığın bütün cari və əsaslı təmir xərclərini özü çəkir və bu xərclər lizinq ödənişlərinə əlavə edilir. Operativ lizinqdə müqavilə sonunda avadanlığın mülkiyyəti lizinq şirkətində qalır. Buna görə də operativ lizinqdə müqavilə müddəti adətən çox qısa olur və lizinqalanın ödənişləri avadanlığın dəyərini tam əhatə etmir.