Maliyyə

Ana səhifə

Maliyyə

Bakıda II İnvestorlar Yarmarkası keçirilir

04 oktyabr 2011 08:36 (UTC +04:00)

“APA-Economics”in məlumatına görə, “Azərbaycanda artıq borclanmaya qarşı mübarizə” mövzusunda keçirilən tədbirdə AMA-nın İdarə Heyətinin sədri Süleyman Kələşov bildirib ki, kredit təşkilatlarının, həmçinin müştərilərin həddən artıq borclanması maliyyə təşkilatları üçün ən problemli məsələlərdən biridir.

Onun sözlərinə görə, müştərilərin həddən artıq borclanmasının qarşısını almaqdan ötrü 2010-cu ildə Azərbaycanda “Bank olmayan kredit təşkilatları haqqında qanun” qəbul edilib: “Bu qanunda bank olmayan kredit təşkilatlarının Azərbaycan Mərkəzi Bankının Mərkəzi Kredit Reyestr Xidmətinə daxil olması qeyd olunub. Bu isə təkrar borclanmanın qarşısını alan vacib alətlərdən biridir”.

S.Kələşov hazırda Azərbaycanda 19 bank olmayan kredit təşkilatının fəaliyyət göstərdiyini bildirib: “Bu təşkilatlar 160 min müştərisi ilə ölkənin 66 rayonunda 150-yə yaxın filial vasitəsilə maliyyə xidməti göstərirlər. Onlarda 2000-dən çox Azərbaycan vətəndaşı çalışır. Bu təşkilatların ümumi kredit portfeli 250 mln. manat təşkil edir”.

Tədbirdə çıxış edən ABŞ-ın Azərbaycandakı səfiri Metyu Brayza bildirib ki, Azərbaycanda Mərkəzi Bank (AMB) tərəfindən aparılan maliyyə islahatları bəyənilir. Onun sözlərinə görə, hazırda Azərbaycan bank sektorunda aparılan islahatlara görə MDB məkanında birinci sıradadır: “Azərbaycanda etiraz səsləri var, müxtəlif aksiyalar keçirilir. Lakin buna baxmayaraq, iqtisadiyyatın diversifikasiyasında yenilikləri göstərmək olar. ABŞ həmçinin ölkənin kənd təsərrüfatı sektoru ilə də maraqlanır. Ölkədə işçi qüvvəsinin 40%-i kənd təsərrüfatı sektorunda çalışır. Lakin buna baxmayaraq, ÜDM-də kənd təsərrüfatının payı 6% təşkil edir. Deməli, bu sektorun reallaşması, potensialı və daha çox imkanları var. ABŞ Avropa və Amerika şirkətlərini Azərbaycanda bu sahənin inkişafı üçün cəlb etmək niyyətindədir. Bu isə öz növbəsində Azərbaycanın kənd təsərrüfatı sektorunun inkişafına böyük təkan verəcək”.

AMB-nin baş direktoru Rəşad Orucov mikromaliyyə sektorunun inkişafında maraqlı olduqlarını bildirib. Onun sözlərinə görə, mikromaliyyə sahəsində ən böyük nailiyyət “Bank olmayan kredit təşkilatları haqqında” qanunun qəbul edilməsi olub: “Yeni qanunun müvafiq maddəsinə əsasən, 6 bank olmayan kredit təşkilatına lisenziya verilib, qalan təşkilatlara isə lisenziya verilmə mərhələsindədir, texniki problemlər həll olunur. Bank olmayan kredit təşkilatlarının inkişaf dinamikası yüksəkdir. Belə ki, ilin əvvəlindən indiyədək məcmu kredit portfelində 20% artım olub. Kapitallaşma da artır ki, bu çox vacib məsələdir”.

AMB-nin Mərkəzi Kredit Reyestr Xidmətinin fəaliyyəti haqqında məlumat verən R.Orucov qeyd edib ki, artıq 7 bank olmayan kredit təşkilatı bu xidmətə qoşulub, qalanları isə qoşulmaqdadır: “Ümumilikdə belə təşkilatların 60%-i bu xidmətə qoşulub”.