Maliyyə

Ana səhifə

Maliyyə

«Dəmirbank» institusional inkişafa sərmayələrini artırır

07 oktyabr 2011 12:08 (UTC +04:00)

Bakı. Elnur Hüseynquluyev – APA-Economics. Azərbaycanın «Dəmirbank» ASC öz infrastrukturunun təkmilləşdirilməsi layihələrinə, o cümlədən bankda İT sisteminin yenidən qurulmasına ümumilikdə 7 mln. avroya yaxın vəsait xərcləyəcək. Bunu «APA-Economics»ə açıqlamasında bankın İdarə Heyətinin sədri Roman Əmircanov bildirib.

R.Əmircanovun sözlərinə görə, oktyabrın sonunadək bankın baş ofisi də daxil olmaqla bütün filiallarda İT infrastruktur sisteminin tamamlanması gözlənilir: «Bütün bu işlər çərçivəsində bankda SAP adlı yeni proqram təminatı da tətbiq edilib. Bu proqram təminatının birinci fazası artıq tamamlanıb, ikinci fazaya isə oktyabrın 20-dən başlanacaq. İkinci fazanın tətbiqi ilə bağlı «KPMG» və ya «PricewaterhouseCoopers» beynəlxalq audit şirkətləri ilə danışıqlar aparılır. Seçim nəticəsində bu iki şirkətdən biri sistemin tətbiqi ilə məşğul olacaq. Sistemin birinci fazası üzrə işləri isə «SportPoint» şirkəti həyata keçirib».

R.Əmircanov bildirib ki, yeni proqram təminatında maliyyə nəzarəti, risklərin idarə edilməsi, müştəri münasibətlərinin tənzimlənməsi, kredit və depozitlərin idarə edilməsi və digər modullar mövcuddur: «Bu proqram Almaniyanın məhsuludur və dəyəri 1,360 mln. avro təşkil edir. Proqramın illik dəstəklənmə haqqı proqram dəyərinin 22%-i civarında (299 min avro), quraşdırılması isə 1,940 mln. avro tələb edir».

Ümumilikdə isə proqram təminatının alınması, quraşdırılması və tam istifadəyə verilməsi layihə üzrə xərclər 3,3 mln. avro təşkil edir.

R.Əmircanov qeyd edib ki, SAP proqram təminatının tətbiqi 20 aya tamamlanacaq və bu sistemin tətbiqindən sonra bankın inkişaf prosesi 3-5 il tezləşəcək.

Xatırladaq ki, «Dəmirbank» (əvvəlki «Azərdəmiryolbank») 1989-cu ildə fəaliyyətə başlayıb. Bankın səhmdarları sırasına Avropa Yenidənqurma və İnkişaf Bankı və Hollandiya İnkişaf Maliyyə Şirkəti (FMO) daxildir. Hazırda bankın ölkə üzrə 31 filial və şöbəsi fəaliyyət göstərir.