Maliyyə

Ana səhifə

Maliyyə

Dövlət Sığorta Nəzarəti Xidməti və «İrəli» İctimai Birliyi «Sığortalı gələcək» adlı yeni layihəyə start verib

12 oktyabr 2011 10:07 (UTC +04:00)

Bakı. Elnur Hüseynquluyev - APA-Economics. Bu gündən Azərbaycan Maliyyə Nazirliyinin Dövlət Sığorta Nəzarəti Xidməti (DSNX) «İrəli» İctimai Birliyi ilə birgə «Sığortalı gələcək» adlı yeni layihəyə start verib.

«APA-Economics»in məlumatına görə, tədbirdə DSNX-nin əməkdaşı Sevda Cəfərzadə çıxış edərək bildirib ki, layihənin əsas məqsədi əhali, xüsusilə gənclər arasında sığorta ilə bağlı maarifləndirmə işinin aparılması, əhali arasında sığorta mədəniyyətinin yüksəldilməsi, cəmiyyətin diqqətinin sığorta məsələlərinə çəkilməsi və sığorta işinin əhaliyə daha fərqli üsullarla çatdırılmasıdır.

Layihə çərçivəsində sığorta seminarı, müsabiqə və flaşmob aksiya həyata keçirilməsi də nəzərdə tutulub. Seminar ümumilikdə 100 nəfər gənci əhatə edəcək, praktiki və nəzəri olmaqla iki hissədən ibarət olacaq. Nəzəri hissədə gənclərə sığorta haqqında ümumi biliklər, sığorta növləri Azərbaycanın sığorta bazarı, dövlətin sığortaya nəzarət tədbirləri haqqında ətraflı məlumatlar verilməsi nəzərdə tutulub. Seminarın praktiki hissəsində isə iştirakçılar komandalara bölünərək simulyasiya oyununda iştirak edəcək və qaliblər xüsusi mükafatlarla mükafatlandırılacaq.

S.Cəfərzadə bildirib ki, seminarlar bu ilin oktyabrın 15-dən etibarən 1 ay müddətində həftədə bir dəfə olmaqla «İrəli» gənclik mərkəzində davam edəcək. Həmçinin layihə çərçivəsində sığorta və sığorta fəaliyyəti haqqında cəmiyyətin məlumatlılıq səviyyəsinin artırmaq və diqqəti bu sahəyə cəlb etmək üçün maraqlı tərəflər olan KİV nümayəndələri, ictimai fəallar və gəncləri əhatə edən «Sığortalı gələcək» adlı yazı müsabiqəsi də keçiriləcək. Dörd nominasiya üzrə (sığorta barədə ən yaxşı foto, karikatura, bloq yazısı və məqalə) təqdim olunmuş işlər arasında 3 ən yaxşısı ictimaiyyətə təqdim olunacaq və müvafiq olaraq I yer 200 manat, II yer 150 manat və sonuncu yerə 100 manat məbləğində mükafat təqdim olunacaq. Müsabiqə iştirakçıları mövzu ilə bağlı KİV-də çap olunan materialların bir nüsxəsini bu ilin oktyabr ayının 26-dək «İrəli» İctimai Birliyinə təqdim etməlidir.