Maliyyə

Ana səhifə

Maliyyə

«Paşa Bank» yeni proqram təminatının tətbiqinə başlayıb

07 dekabr 2011 08:19 (UTC +04:00)

Bakı. Elnur Hüseynquluyev – APA-Economics. Bu gün Azərbaycanın «Paşa Bank» ASC «SafeWatch Filtering» proqram təminatının tətbiqinin təqdimatı ilə bağlı tədbir keçirib.

«APA-Economics»in məlumatına görə, tədbirdə bankın əməliyyatlar üzrə direktoru Emil Hacıyev yeni sistemin tətbiqi ilə bağlı bankda ayrıca departamentin yaradıldığını və proqramın tətbiqi üçün bankda adekvat avtomatlaşdırılmış sistemin qurulduğunu bildirib. Bütün bu proqram təminatının qurulması Azərbaycan Mərkəzi Bankı yanında Maliyyə Monitorinq Xidmətinin qoyduğu tələblərdən irəli gəlir.

«SafeWatch Filtering» bank və digər maliyyə təşkilatları üçün müasir tədbirlər kompleksidir, cinayət yolu ilə əldə edilmiş vəsaitlərin qanuniləşdirilməsi və terrorizmin maliyyələşdirilməsinin əleyhinə yönəlmiş (Anti Money Laundering) beynəlxalq və milli qanunvericilik normalarına əməl edilməsinə imkan yaradır.

Bu proqramın müxtəlif modulları - FATF/GAFI, EU, UN, OFAC və digər beynəlxalq «qara siyahılarda» saxlanan qeydlərlə üst-üstə düşən məlumatların daxil olduğu verilənlərin, əməliyyatların və faylların on-line rejimdə filtrlənməsini aparır. Aparılmış təhlillərin nəticələri hesabat formasında təqdim edilir.

Bu proqram təminatı «Raiffeisen Bank», «Bank of China», «HypoVereinsbank», «Nordea Group», «ING Bank», «ABN Amro Bank N.V», «Credit Lyonnais Bank», «Fortis Bank» və dünyanın ən iri maliyyə təşkilatları və bankları tərəfindən istifadə edilir. MDB ölkələri ərazisində indiyə qədər bu proqram ancaq Rusiya və Ukraynanın aparıcı bankları tərəfindən istifadə olunub.

Xatırladaq ki, «Paşa Holding» Şirkətlər Qrupuna daxil olan «Paşa Bank» 2007-ci il noyabr ayından fəaliyyət göstərir.