Maliyyə

Ana səhifə

Maliyyə

Asiya İnkişafı Bankı bu il Azərbaycandakı layihələrin icrasına 69 mln. dollar ayırıb - FOTO

Asiya İnkişafı Bankı bu il Azərbaycandakı layihələrin icrasına 69 mln. dollar ayırıb - <font color=red>FOTO</font>

09 dekabr 2011 10:29 (UTC +04:00)

Bakı. Vahab Rzayev – APA-Economics. Asiya İnkişafı Bankı (AİB) tərəfindən 2011-ci ildə Azərbaycanda müxtəlif layihələrin icrasının maliyyələşdirilməsi üçün 69 mln. ABŞ dolları həcmində ödənişlər həyata keçirilib. «APA-Economics»in məlumatına görə, bunu bu gün AİB-in Azərbaycanda 2011-ci ildəki fəaliyyətinə həsr olunmuş mətbuat konfransında Bankın ölkədəki daimi nümayəndəliyinin rəhbəri Olli Noroyono bəyan edib.

O.Noroyono bildirib ki, bu ilin ortalarında Bank Azərbaycanla bağlı Ölkə üzrə Əməliyyatlara dair Biznes Planı təsdiq edib. Biznes Plan 2011-2013-cü illərdə Bank tərəfindən ölkəyə təxminən 1 mlrd. dollar həcmində kreditlərin ayrılmasını nəzərdə tutur.

Bu il AİB nəqliyyat sektorunda təxminən 23 mln. dollar həcmində ödənişlər həyata keçirib ki, bu vəsaitlər əsasən Gəncə dolama yolu, Masallı-Astara avtomagistralı və yerli əhəmiyyətli yolların tikintisinə sərf edilib. Dekabrın sonunda Bank rəhbərliyi Masallı-Astara yolunun tikintisinin davam etdirilməsi üçün 200 mln. dollar həcmində olan üçüncü tranşı təsdiq etməyi planlaşdırır. Qeyd edək ki, Masallı-Astara yolunun tikintisi 2013-cü ildə, Gəncə dolama yolunun tikintisi isə 2012-ci ilin ortalarında tamamlanması gözlənilir.

O.Noroyono bəyan edib ki, bundan başqa 2011-ci ildə su təchizatı və kanalizasiya sektoru üzrə Bank təxminən 11 mln. dollar həcmində ödəniş həyata keçirib. Həmin vəsait ümumi dəyəri 600 mln. dollar olan Su təchizatı və kanalizasiya İnvestisiya Proqramı çərçivəsində Naxçıvan və Göyçay şəhərlərində su təchizatı və kanalizasiya layihələrinin maliyyələşdirilməsinə yönəldilib. Naxçıvan, Göyçay, Ağdaş və Beyləqan rayonlarında su və kanalizasiya sisteminin yenidən qurulması üçün 300 mln. dollar həcmində ikinci tranşın 2011-ci ilin dekabrın sonunadək Bank rəhbərliyi tərəfindən təsdiq edilməsi planlaşdırılır.

Energetika sektorunda Elektrik Ötürücü Xətləri Layihəsi çərçivəsində Bank təxminən 35 mln. dollar həcmində ödəniş həyata keçirib. Layihə çərçivəsində Mingəçevirdən Abşeronadək 280 km uzunluğunda və «Şimal» elektrik stansiyasından Hövsan qəsəbəsinə qədər uzunluğu 97 km olan elektrik ötürücü xətləri və 5 yarımstansiyanın tikintisi nəzərdə tutulur. Layihənin 2012-ci ilin ortalarında tamamlanması planlaşdırılır.

O.Noroyononun sözlərinə görə, Ölkə üzrə Əməliyyatlara dair Biznes Plan çərçivəsində gələn il üçün strategiyanın layihəsi (maliyyələşdiriləcək yeni sahələr və layihələr) hazırda hökumətlə müzakirə olunur.

Qeyd edək ki, Asiya İnkişaf Bankının mənzl-qərargahı Manilada yerləşir və qurumun əsas məqsədi iqtisadi artım, ekoloji cəhətdən inkişaf və regional inteqrasiya yolu ilə yoxsulluğun azaldılmasıdır. Bank 1966-cı ildə təsis edilib və onun hazırda 67 üzvü var. Ötən il ərzində bank tərəfindən ayrılan vəsaitlərin həcmi 17,51 mlrd. dollar təşkil edib. Bundan başqa Bankın hazırkı Ticarət Maliyyələşdirilməsi Proqramı ilə ticarətə 2,8 mlrd. dollar dəyərində dəstək verib.