Maliyyə

Ana səhifə

Maliyyə

Avropa ölkələri büdcə kəsirinin həcmini kəskin azaltmaq barədə razılığa gəlib

09 dekabr 2011 10:55 (UTC +04:00)

Bakı - APA-Economics. Avrozona ölkələri büdcə kəsirinin ÜDM-ə nisbətini 0,5% səviyyəsində ixtisar etmək barədə razılığa gəliblər.

“APA-Economics”in “Bloomberg”ə istinadən xəbərinə görə, dövlət büdcəsinin ÜDM-ə nisbəti 60%-dən aşağı olan ölkələr daha yüksək kəsirə malik ola bilər.

Hazırda Avropa Birliyində (AB) büdcə kəsirinin ÜDM-ə olan nisbətinin yuxarı həddi 3%-dir. Amma bu, avrozona üçün tövsiyə xarakteri daşıdığından, AB-nin qanunvericilik aktlarında bu tələbi pozan ölkələrə qarşı hər hansı sanksiya nəzərdə tutulmur.

Yeni həddin nə vaxtdan qüvvəyə minəcəyi bəlli deyil. Cari ildə və 2012-ci il üçün büdcə planlarında AB ölkələrinin əksəriyyəti və bütün avrozona ölkələri kəsirin göstərilən həddən 0,5% çox olacağını proqnozlaşdırırlar.

AB qurumlarına iqtisadiyyatın tənzimlənməsində daha böyük səlahiyyətlər verilməsini nəzərdə tutan yeni ittifaq sazişinə gəlincə, hələlik bununla bağlı razılıq əldə etmək mümkün olmayıb. Sazişin əsas əleyhdarı isə Böyük Britaniya olub. London AB-nin maliyyə tənzimlənməsinə dair istənilən qərarına veto hüququ əldə etmək istəyir. Bundan başqa, Macarıstan da yeni ittifaq sazişinin əleyhinə çıxır, Çexiya və İsveç isə sənədi dəstəkləməzdən öncə milli qanunvericilik orqanları ilə məsləhətləşməyi qərara alıb.

AB ölkələri arasında konsensus əldə olunmazsa, avrozonaya daxil olan 17 ölkə maliyyə sabitliyi və tənzimləmə barədə ayrıca müqavilə imzalaya bilər.

AB-nin Brüsseldə keçirilən sammitində Avropa Maliyyə Sabitliyi Fondunun (EFSF) həcminin 500 mlrd. avro ilə məhdudlaşdırılması haqqında da qərar qəbul edilib. Fondun idarəçiliyi Avropa Mərkəzi Bankının əlində olacaq. Sammitin əsas müzakirə mövzusu avrozonanın bir sıra ölkələrini iflas həddinə gətirmiş borc böhranıdır.

Xatırladaq ki, avrozonada böhran 2009-cu ildə Yunanıstandan başlayıb. Sonradan böhran İtaliya, İspaniya, İrlandiya və Portuqaliyanı da əhatə edib. Avropa İttifaqının “zəif bəndi” sayılan Yunanıstanın özəl və milli kreditorlar qarşısında dövlət borcu hazırda 340 mlrd. avro (adambaşına 31 min avro) təşkil etməklə Avropanın bütün vergi ödəyiciləri üçün ağır yükə çevrilib. Hesablamalara görə, hər bir avropalı dolayı yolla Afinaya 535 avro kömək edir.