Maliyyə

Ana səhifə

Maliyyə

«Azərpoçt» və «AtaSığorta» arasında əməkdaşlıq müqaviləsi imzalanıb

14 dekabr 2011 13:53 (UTC +04:00)

Bakı. Elnur Hüseynquluyev – APA-Economics. Bu gün Bakıda «AtaSığorta» şirkəti ilə «Azərpoçt» MMC arasında sığorta xidmətlərinin göstərilməsinə dair müqavilə imzalanıb. APA-Economics»in məlumatına görə, müqavilənin şərtlərinə əsasən, «AtaSığorta» şirkətinin könüllü və icbari sığorta növləri üzrə xidmətlər «AzərPoçt»un filialları və şöbələri vasitəsi ilə əhaliyə təklif ediləcək.

Tədbirdə iştirak edən «AtaSığorta» şirkəti İdarə Heyətinin sədri Tamirlan Hacıyev bildirib ki, sığorta bazarının növbəti ildə genişlənməsini proqnozlaşdıraraq «AtaSığorta» şirkəti özünün yeni biznes strategiyasını hazırlayıb: «Bu istiqamətdə görülən əsas işlərdən biri kimi geniş şəbəkəyə malik qurumlarla əməkdaşlıq əlaqələrinin qurulmasına böyük önəm verilir. Aparılan işlərin nəticəsi olaraq, «AtaSığorta» ilə ölkənin ən iri şəbəkəsinə malik olan «Azərpoçt» arasında əməkdaşlıq müqaviləsi bağlanılır. Ümid edirəm ki, bağlanan müqavilə sığorta məhsullarının müasir səviyyədə və keyfiyyətlə sığortaolunanlara təqdim edilməsində böyük rol oynayacaq».

«Azərpoçt» MMC-nin baş direktorunun müavini Sübhan Kazımov isə dövlət tərəfindən sığorta sektorunun inkişaf etdirilməsi, bu xidmət növünün köməyi ilə əhalinin sosial müdafiəsinin gücləndirilməsinə böyük diqqət yetirildiyini bildirib: «Bu ildən yeni icbari sığorta növlərinin tətbiqinə başlanılıb, bu baxımdan hesab edirəm ki, milli poçt operatoru kimi «AzərPoçt» MMC-nin də üzərinə böyük vəzifələr düşür. Bütün ölkəni əhatə edən poçt şöbələrində əhalinin rahat şəkildə sığorta məhsullarını «AtaSığorta» şirkətindən əldə etmələrinə imkan yaradacağıq».

«AtaSığorta» şirkəti İdarə Heyətinin sədr müavini İsrail Qarayevin sözlərinə görə, bu müqavilə «Azərpoçt» MMC ilə eksklüziv tərəfdaşlıq xarakteri daşımır. İstənilən şəxs bu xidmətlərin göstərilməsi üçün «Azərpoçt»la müqavilə bağlaya bilər. «AtaSığorta» şirkətinin gələcək planlarından danışan İ.Qarayev sığorta bazarının inkişafına töhfə vermək, həmçinin icbari sığorta növləri üzrə fəaliyyəti təmin etmək məqsədi ilə şirkətin İcbari Sığorta Bürosunun təsisçisi və iştirakçısı olduğunu da qeyd edib.

Xatırladaq ki, təsisçisi «AtaHolding» Şirkətlər Qrupu olan «AtaSığorta» ASC 2004-cü ilin sentyabr ayından fəaliyyət göstərir. Cari il dekabrın 1-nə şirkətin nizamnamə kapitalı 5 mln. manat təşkil edib. Şirkət 22 könüllü və 5 icbari sığorta növü üzrə xidmət göstərir.