Maliyyə

Ana səhifə

Maliyyə

Azərbaycanda icbari sığorta şəhadətnaməsinin olmaması sürücünü avtomobil idarə etmək hüququndan məhrum edəcək

19 dekabr 2011 14:04 (UTC +04:00)

Bakı. Elnur Hüseynquluyev - APA-Economics. Bu gün Maliyyə Nazirliyinin Dövlət Sığorta Nəzarəti Xidməti (DSNX) «İcbari sığortalar haqqında» qanunun icrası ilə bağlı geniş tədbir keçirilib.

«APA-Economics»in məlumatına görə, tədbirdə DSNX rəisi vəzifəsini icra edən N.Xəlilov bildirib ki, yeni qanunda «Daşınmaz əmlakın icbari sığortası», «Avtonəqliyyat vasitəsi sahiblərinin mülki məsuliyyətinin icbari sığortası», «Daşınmaz əmlak sahiblərinin mülki məsuliyyətinin icbari sığortası» və «Sərnişinlərin icbari sığortası» sahəsində sığortaçılar, sığorta olunanlar və faydalanan şəxslər arasında hüquqi və iqtisadi münasibətləri tənzimləyir.

N.Xəlilov deyib ki, qanunda qeyd olunan sığorta növləri əvvəllər də mövcud olub: «Hazırkı qanun hər bir icbari sığorta növünün ümumi prinsip və standartlar əsasında həyata keçirilməsini, vahid yanaşmalara və terminlərə əsaslanmasını, onların mövcud bazar reallıqlarını və inkişaf etmiş beynəlxalq təcrübəyə uyğunlaşdırılmasını təmin etmək, nəticədə əhalinin sosialı təhlükəsizliyinə daha əhatəli təminat yaratmaq məqsədi ilə qəbul edilib».

N.Xəlilov qeyd edib ki, qanun «Avtonəqliyyat vasitəsi sahiblərinin mülki məsuliyyətinin icbari sığortası» növü üzrə sığorta ödənişlərinin verilməsini maksimum sadələşdirməyə, bu sahədə sığortalıların hüquqlarının və qanuni mənafelərinin qorunmasının gücləndirilməsinə yönəlib: “Qanuna görə, sığorta ödənişindən imtina etmək üçün heç bir hal nəzərdə tutulmayıb. Zərərçəkənlər hər bir halda zərərin əvəzini alacaqlar. Lakin bəzi hallarda - təqsirkar sürücü sərxoş olduqda, hadisə yerini tərk etdikdə, hadisəni qəsdən törətdikdə, onun avtonəqliyyat vasitəsini idarə etməyə hüququ olmadıqda, sığortaçı zərərçəkənlərə sığorta ödənişi verdikdən sonra ödədiyi məbləğləri təqsirkar sürücüdən tələb etmək hüququna malikdir. Əvvəlkindən fərqli olaraq, yeni qanunda bəzi hallarda DYP tərəfindən verilən müvafiq arayış olmadan da sığorta ödənişi nəzərdə tutulur. Bu, qəza iştirakçılarının sayı 2 olduqda, hadisə nəticəsində sağlamlığa heç bir zərər dəymədikdə, hər iki tərəfin sığortası olduqda, tərəflər təqsirin kimdə olmasına dair həmfikir olduqda, ziyanın məbləği 1 000 manatdan çox olmadıqda mümkündür”.

N.Xəlilovun sözlərinə görə, icbari sığorta şəhadətnaməsi sürücülük vəsiqəsi, texniki pasport və etibarnamə kimi daim sürücünün üstündə olmalıdır: «Yol hərəkəti haqqında» qanuna əsasən, sığortanın olmaması sürücünü avtomobili idarə etmək hüququndan məhrum edir».

N.Xəlilov daha sonra icbari sığortanın digər növləri haqqında məlumat verib, tədbir iştirakçılarını maraqlandıran sualları cavablandırıb.