Maliyyə

Ana səhifə

Maliyyə

MONEYVAL Azərbaycanın ikinci tərəqqi hesabatını qəbul edib

20 dekabr 2011 07:05 (UTC +04:00)

Bakı. Nicat Mustafayev – APA-Economics. Strasburqda (Fransa) Avropa Şurasının Pulların yuyulmasına və terrorçuluğun maliyyələşdirilməsinə qarşı tədbirlərin qiymətləndirilməsi üzrə Ekspertlər Komitəsinin (MONEYVAL) 37-ci plenar iclası keçirilib.

Azərbaycan Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, iclasda QKDK-nin sədri Rüfət Aslanlının rəhbərliyi ilə Azərbaycan nümayəndə heyəti iştirak edib.

Plenar iclasın gündəliyinə Azərbaycan tərəfindən pulların yuyulması və terrorçuluğun maliyyələşdirilməsinə qarşı mübarizə (PY/TMM) sahəsində həyata keçirilmiş tədbirlərə dair ikinci tərəqqi hesabatının müzakirəsi məsələsi də daxil edilib.

İlkin olaraq, Azərbaycan hökuməti tərəfindən təqdim olunmuş tərəqqi hesabatı üzrə Komitənin Katibliyi və məruzəçi ölkə qismində çıxış edən Polşanın nümayəndə heyəti tərəfindən aparılmış təhlil dinlənilib. Hər iki təhlildə hesabat dövrünü əhatə edən son iki il ərzində Azərbaycanda PY/TMM sahəsində əhəmiyyətli tərəqqinin əldə edildiyi, hüquqi və institusional mexanizmlərin beynəlxalq standartlara uyğunlaşdırıldığı və ümumilikdə, hökumətin bu sahədə üzərinə götürdüyü beynəlxalq öhdəliklərə diqqətlə yanaşdığı qeyd olunub.

Daha sonra, plenar iclas çərçivəsində aparılmış müzakirələrin gedişində Latviya, Estoniya, Kipr, San-Marino və s. ölkələrin nümayəndə heyətləri, həmçinin Dünya Bankının və Beynəlxalq Valyuta Fondunun təmsilçiləri tərəqqi hesabatına dair suallar verib, eləcə də Azərbaycanın müvafiq sahədə əldə etdiyi nəticələrə dair öz münasibətlərini bildirib.

Müzakirələrin yekununda tərəqqi hesabatı MONEYVAL Komitəsi tərəfindən qəbul edilib.

Həmçinin plenar iclasın gedişində, gündəliyə uyğun olaraq, Komitənin Bürosunun sədri, sədr müavini və üzvləri vəzifələrinə növbəti seçki keçirildi və Büronun hazırkı sədri və müavini növbəti səlahiyyət dövrü üçün müvafiq vəzifələrə yenidən təyin edilib.

Plenar iclasın gedişində Monako, İsrail, Ukrayna, Estoniya, Moldova, Rumıniyanın 3-cü mərhələ tərəqqi hesabatlarına, eləcə də Albaniya, Bosniya və Herseqovina, Xorvatiya və digər ölkələrin PY/TMM sahəsində həyata keçirdiyi tədbirlərə dair müzakirələr aparılıb.

İclas zamanı həmçinin 2012-ci il üçün MONEYVAL çərçivəsində həyata keçiriləcək qiymətləndirmə və görüşlərin gündəliyi də qəbul olunub.