Maliyyə

Ana səhifə

Maliyyə

«Atəşgah Sığorta» şirkəti 15 illiyini qeyd edib

21 dekabr 2011 13:58 (UTC +04:00)

Bakı. Elnur Hüseynquluyev - APA-Economics. Azərbaycanın «Atəşgah Sığorta» şirkəti 15 illiyini qeyd edib.

Şirkətin baş ofisindən «APA-Economics»ə verilən məlumata görə, 1996-cı ilin dekabrında təsis edilib və hazırda işçilərin sayı 250 nəfərə yaxındır. Şirkət üzrə işçilərin orta yaş həddi 30 yaş təşkil edir. Şirkətin Bakıda 8, Azərbaycanın regionlarında isə 9 ofisi fəaliyyət göstərir.

Şirkətdən bildirib ki, əgər 1997-ci ildə şirkətin sığorta haqlarının həcmi 757 min manat, ödənişləri isə 16 min manat təşkil edirdisə, 2011-ci ilin yanvar-noyabr ayları üzrə bu göstəricilər müvafiq olaraq 15 mln. manat və 5 mln. manat həddini keçib.

Şirkət göstərdiyi xidmətlərin keyfiyyətinin yaxşılaşdırılması məqsədilə informasiya texnologiyalarının tətbiqinə xüsusi diqqət yetirir. Belə ki, «Atəşgah Sığorta» şirkətində sığorta uçotu və sənəd dövriyyəsi üçün ən qabaqcıl informasiya sistemi tətbiq edilib ki, bu da öz növbəsində əməliyyat proseslərinin keyfiyyət baxımından yeni texnoloji səviyyədə olması üçün güclü zəmin yaradır. Şirkətdə həmçinin müştərilərə göstərilən xidmətin keyfiyyətini artırmaq məqsədilə daxil olan telefon zənglərinin fasiləsiz icrası sistemi tətbiq edilib.

Şirkət 15 illik konsepsiyası çərçivəsində loqotipini «Atəşgah»ın irəliyə doğru hərəkətini tərənnüm edən «Al yelkənlər»lə bəzəyib. Bu il şirkət tarixi abidə olan «Atəşgah» od məbədini və Azərbaycanda ilk dəfə olaraq «Eurovision 2011» musiqi müsabiqəsinin qalibi Nigar Camalın simasını sığortalayıb, həmçinin «Motor Büro»su vasitəsilə on-line rejimində ilk icbari sığorta polisinin satışını həyata keçirib.

Qeyd edək ki, «Atəşgah Sığorta Qrupu»na «Atəşgah Sığorta», «Atəşgah Həyat» sığorta şirkəti və «İntermed» tibb klinikası daxildir.