Maliyyə

Ana səhifə

Maliyyə

«IBA-Express» təcili pulköçürmə sistemi üzrə dövriyyə artıb

21 fevral 2012 10:07 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankının (ABB) törəmə müəssisəsi olan «ABB Moskva»nın «IBA-Express» təcili pulköçürmə sistemi vasitəsi 2011-ci il ərzində Rusiyadan Azərbaycana 61,125 mln. ABŞ dolları həcmində vəsait göndərilib ki, bu da sistemin tətbiq olunduğu 2009-cu il ilə müqayisədə 2,2% çoxdur. Bununla yanaşı, dollarla aparılan əməliyyatların sayı 0,7% artıb.

ABB-nin mətbuat xidmətindən «APA-Economics»ə verilən məlumata görə, hesabat ilində Rusiyadan Azərbaycana həmçinin 132,633 mln. rubl və 763,223 min avro həcmində pul göndərilib. Qeyd olunan müddət ərzində avro üzrə əməliyyatların həcmi 39%, əməliyyatların sayı isə 6,2% azalıb.

ABB-dən bildirilib ki, hesabat ilində bu sistem vasitəsi ilə Azərbaycandan Rusiyaya göndərilən dollar kütləsinin həcmi 31% artaraq 7,350 mln-a çatıb. Bununla yanaşı, ötən il Azərbaycan vətəndaşları tərəfindən Rusiyaya 10,804 mln. rubl və 172,028 min avro göndərilib. Təhlil olunan müddət ərzində avro üzrə əməliyyatların həcmi 70% azalıb.

Həmçinin bildirilir ki, 2009-2011-ci illərdə Rusiyaya dollarla göndərişlərin sayı 83% artaraq 2 181-ə, avro ilə əməliyyatların sayı isə sabit qalaraq 60 olub.

Xatırladaq ki, bu xidmət fiziki şəxslər arasında 1% komisyon haqqı ödənilməklə 5-10 dəqiqə ərzində Azərbaycandan Rusiyaya və əks istiqamətdə təcili pul köçürmələrinin həyata keçirilməsini təmin edir. Sistemin üstünlüklərindən biri üç valyuta ilə köçürmə etmək imkanının olmasıdır. Vətəndaş konvertasiya əməliyyatı aparmadan vəsait göndərə və ala bilər.

ABB-dən bildirilib ki, «ABB-Moskva»nın filial şəbəkəsinin artması ilə bu təcili pulköçürmə sisteminin də coğrafiyası genişlənib, əməliyyatların sayı artıb. «IBA-Express» sistemin xidmətindən təkcə paytaxt Moskvada deyil, Sankt-Peterburq və Yekaterinburq şəhərlərində də yararlanmaq mümkündür. Sistemə olan tələbatın artması bu xidmətin «ABB-Gürcüstan» bankı vasitəsi ilə Gürcüstanda da istifadəsini reallaşdırıb.

Xatırladaq ki, təsisçisi ABB (100%) olan «ABB-Moskva» 2002-ci ilin yanvarından fəaliyyət göstərir.