Maliyyə

Ana səhifə

Maliyyə

Azərbaycan Mərkəzi Bankında geniş iclas keçirilib

21 fevral 2012 10:17 (UTC +04:00)

Bakı. Vahab Rzayev – APA-Economics. Azərbaycan Mərkəzi Bankı (AMB) İdarə Heyətinin 2011-ci ilin yekunlarına həsr olunmuş geniş iclası keçirilib. Mərkəzi Bankdan «APA-Economics»ə verilən məlumata görə, iclasda çıxış edən Bankın sədri Elman Rüstəmov bildirib ki, mürəkkəb qlobal iqtisadi proseslər fonunda ölkədə iqtisadi inkişafın dayanıqlığının qorunmasında Mərkəzi Bank fəal iştirak edib.

E.Rüstəmovun sözlərinə görə, ölkədə inflyasiya aşağı səviyyədə qorunur, milli valyutanın sabitliyi və bankların iqtisadi inkişafa maliyyə dəstəyi təmin edilir, müasir ödəniş sistemləri fəaliyyət göstərir və maliyyə xidmətlərinin keyfiyyəti artırılır.

Qeyd edilib ki, qlobal böhranın neqativ təsirlərin aradan qalxdığı hazırkı dövrdə Mərkəzi Bankın siyasəti yenidən inflyasiyanın azaldılmasına yönəldilib. Eyni zamanda, AMB pul siyasəti və prudensial tənzimləmə strategiyasının post-böhran dövrünün çağırışlarına uyğunlaşdırılmasına başlayıb. Bank nəzarətinin yeni «kontr-tsiklik» idarəetmə çərçivəsi aktiv olaraq inkişaf etdirilir. Pul siyasəti ilə prudensial siyasətin çərçivəsinin inteqrasiyası sahəsində mühüm innovasiyalar tətbiq edilir. Son qlobal çağırışlardan irəli gələrək qiymət sabitliyi və maliyyə sabitliyi hədəflərinin harmonlaşması həyata keçirilir. Pul və maliyyə sabitliyi siyasəti dərin tədqiqat və analitik bazaya əsaslanır.

E.Rüstəmov bildirib ki, müasir mərhələdə Mərkəzi Bank fundamental strateji çağırış qarşısındadır və bunlar Bankın institusional potensialının daha da müasirləşdirilməsini tələb edir. AMB-nin növbəti strateji planlaşdırma mərhələsinə daxil olduğunu qeyd edən E.Rüstəmov qeyd edib ki, bu mərhələdə Bank tərəfindən həyata keçiriləcək layihələr Mərkəzi Bankın institusional təkmilləşdirilməsi və modernləşməsinə xidmət edəcək. AMB makroiqtisadi və maliyyə sabitliyini təmin edən yeni mexanizmləri inkişaf etdirmək məqsədilə qlobal miqyasda formalaşan yeni standartları əsas götürəcək. Cari ildə də bank sisteminin tənzimlənməsi və nəzarət çərçivəsinin ən son beynəlxalq təcrübə və standartlar əsasında köklü müasirləşdirilməsi başlıca prioritet olacaq.