Bank Of Baku

Bu ilin birinci rübündə Azərbaycanda vergi cinayətləri ilə əlaqədar 114 cinayət işi açılıb

Bu ilin birinci rübündə Azərbaycanda vergi cinayətləri ilə əlaqədar 114 cinayət işi açılıb
# 10 aprel 2012 10:07 (UTC +04:00)
Bakı - APA-Economics. Bu ilin birinci rübü ərzində vergi cinayətlərinə qarşı mübarizə sahəsində Vergilər Nazirliyi tərəfindən vergidən yayınma, qanunsuz sahibkarlıq və digər faktlarla bağlı materiallar üzrə 114 cinayət işi başlanıb, onlardan 84-nün ibtidai istintaqı tamamlanıb.

Nazirliyin Analitik-informasiya şöbəsindən “APA-Economics”ə verilən məlumata görə, vergiləri ödəməkdən yayınmaya görə 112 iş, qanunsuz sahibkarlığa görə isə 2 iş üzrə, cəmi 13 nəfər barəsində 12 cinayət işi baxılmaq üçün aidiyyəti məhkəmələrə göndərilib.

İcraatına xitam verilmiş 72 cinayət işindən 60-ı üzrə bir sıra müəssisələrin rəhbərləri və fiziki şəxslər tərəfindən vergidən yayındırılmış 1 mln. 744 min manat məbləğində vəsaitin dövlət büdcəsinə ödənilməsi təmin olunub.

Cinayət işləri üzrə keçirilmiş istintaq-əməliyyat tədbirləri nəticəsində vergi cinayətləri törətdiklərinə görə barələrində axtarış elan edilmiş 8 şəxs tutularaq Vergilər Nazirliyi yanında Vergi Cinayətlərinin İbtidai araşdırılması Departamentinin İstintaq şöbəsinə təhvil verilib, ibtidai istintaqdan yayınan 53 nəfər şəxsin məcburi qaydada gətirilməsi, 58 şəxsin tapılıb istintaqa cəlb edilməsi, 101 şəxsin isə yerinin müəyyən olunaraq istintaqa məlumat verilməsi təmin edilib. Vergi yoxlamalarından yayınan 165 nəfər vergi ödəyicisi tapılıb aidiyyəti vergi orqanlarına təqdim olunub.

“İstehlakçıların maarifləndirilməsi, hüquqlarının müdafiəsi” İctimai Birliyinin sədr müavini Sərdarov Azər Ədalət oğlunun özünü vergi orqanının əməkdaşı kimi təqdim edərək fiziki şəxs Həsənəliyev Mehman Şirin oğlundan 200 manat məbləğində rüşvət alması və sonrakı hər 6 ay üçün göstərilən məbləğdə pul tələb etməsi faktı müəyyən edilərək toplanmış materiallar Baş prokuror yanında Korrupsiyaya qarşı Mübarizə İdarəsinə göndərilib.

Vergi hüquqpozmalarına yol vermiş şəxslərə qarşı qanunda nəzərdə tutulmuş mübarizə tədbirləri davam etdirilir.
1 2 3 4 5 İDMAN XƏBƏR
#
#

ƏMƏLİYYAT İCRA OLUNUR