Maliyyə

Ana səhifə

Maliyyə

Azərbaycan Beynəlxalq Bankı müştərilərə yeni xidmət təqdim edib

13 aprel 2012 13:03 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankı (ABB) müştərilərə daha bir bank xidməti - POS-Kredit xidmətini təqdim edib. ABB-nin mətbuat xidmətindən «APA-Economics»ə verilən məlumata görə, POS-Kredit xidməti plastik kart sahiblərinə mədaxil əməliyyatlarını çevik şəkildə həyata keçirməsinə şərait yaradır. Müştəri sadəcə xəzinə şöbəsinə yaxınlaşaraq kartını və yerləşdirmək istədiyi vəsaiti təqdim edir. Həmin vəsait əməliyyat keçirildiyi an artıq kartın balansında əks olunur və müştəri əminliklə istədiyi əməliyyatı apara bilər.

Qeyd edək ki, ABB-nin kartlarının sahiblərindən başqa, «Azericard» Prosessinq Mərkəzində xidmət olunan digər bankların, o cümlədən, «ABB-Moskva»nın kart istifadəçiləri də bu xidmətdən yararlana bilər. ABB-nin istifadəçilərinə pulsuz olan bu xidmət, «ABB-Moskva» və «Azericard» Prosesinq Mərkəzi tərəfindən xidmət olunan digər banklar üçün xüsusi tarif dərəcələri 0,1% təşkil edir. Müştərinin vaxtına qənaət etmək imkanı yaradan bu xidmət öz növbəsində bank üçün də mədaxil əməliyyatlarını sadələşdirir.

«Ümümblikdə, bu xidmətin üstünlükləri ondan ibarətdir ki, vəsait on-line rejimdə müştərinin hesabında əks olunur, başqa bankların kart sahibləri də bu xidmətdən istifadə edə, həm də müştəri hesab nömrəsini bilib-bilmədiyindən asılı olmayaraq bu xidmətdən yararlana bilər», - deyə mətbuat xidmətindən bildirilib.

Xatırladaq ki, ABB 1992-cı ilin yanvarından fəaliyyət göstərir və ölkənin ən böyük bankıdır. Bankın səhmlərinin 50,2%-i dövlətə, 49,8%-i isə fiziki və özəl hüquqi şəxslərə məxsusdur.