Maliyyə

Ana səhifə

Maliyyə

Azərbaycanda manat pul kütləsi 23% artıb

05 iyul 2013 09:33 (UTC +04:00)

Bakı. Vahab Rzayev – APA-Economics. Azərbaycanda geniş mənada pul kütləsinin (M3 aqreqatı) həcmi 2013-cü il iyunun 1-nə 17 109,4 mln. manat təşkil edib ki, bu da 2012-ci ilin müvafiq dövrü ilə müqayisədə 2 529,9 mln. manat və ya 17,4% çoxdur.

Azərbaycan Mərkəzi Bankından «APA-Economics»ə verilən məlumata görə, təkcə bu ilin yanvar-may aylarında geniş mənada pul kütləsi 334,1 mln. manat və ya 2,0% artıb.

Qeyd edək ki, M3 aqreqatının strukturuna banklardan kənarda nağd pullar, tələb olunanadək və müddətli əmanət və depozitlər daxildir.

Pul kütləsinin M2 aqreqatı (manat pul kütləsi) son bir ildə 2 681,5 mln. manat və ya 23,4% artaraq 14 138,2 mln. manata çatıb:

(mln. AZN)

	01.06.2012	01.01.2013	01.06.2013
M0 (nağd pul)	7 509,9	9 256,6	9 098,2
M1 (nağd pul, tələb olunanadək əmanət və depozitlər)	9 194,7	11 107,9	11 198,3
M2 (nağd pul, tələb olunanadək və manatla müddətli əmanət və depozitlər)	11 456,7	13 806,4	14 138,2
M3 (nağd pul, tələb olunanadək və müddətli əmanət və depozitlər)	14 579,5	16 775,3	17 109,4

Göründüyü kimi, son bir il ərzində nağd manat kütləsi 1 588,3 mln. manat və ya 21,2% artıb. Beləliklə, manat pul kütləsinin artımının 59,2%-i nağd pullarının artmasının payına düşür.

Ölkədə nağdlaşma səviyyəsi bu ilin iyunun 1-nə 64,4%-ə bərabər olub ki, bu da illik müqayisədə 1,2 faiz bəndi azdır.

Qeyd edək ki, 2010-2011-ci illərlə müqayisədə manat kütləsinin artım tempi müəyyən dərəcədə azalıb. Belə ki, 2010-cu ildə artım 34,5%, 2011-ci ildə 32,5%, 2012-ci ildə 25,6% təşkil edib.