Maliyyə

Ana səhifə

Maliyyə

Azərbaycanın xaricdən cəlb etdiyi kapitalın həcmi 31% artıb

14 dekabr 2012 09:11 (UTC +04:00)

Bakı. Vahab Rzayev – APA-Economics. Azərbaycanın 2012-ci ilin yanvar-sentyabr ayları üzrə tədiyyə balansında əks olunmuş xaricdən cəlb olunan kapitalın ümumi həcmi 7,6 mlrd. ABŞ dolları təşkil edib ki, bu da ötən ilin müvafiq dövrünün göstəricisindən 30,6% çoxdur.

Azərbaycan Mərkəzi Bankından «APA-Economics»ə verilən məlumatına görə, bu göstərici əsasən ölkəyə cəlb olunmuş birbaşa investisiyalar və xarici kreditlər hesabına formalaşıb:

(mln. dollar)

Cəlb olunan xarici kapitalın strukturu
	2011-ci il, 9 ay	2012-ci il, 9 ay
Birbaşa investisiyalar	3 108,3	3 972,6
- neft-qaz sektoru	2 422,3	3 128,1
- digər sektorlar	686,0	844,5
Kreditlər və digər investisiyalar	2 683,2	3 612,9
- dövlət təminatlı kreditlər	744,4	805,1
- dövlət təminatlı olmayan kreditlər	1 501,1	1 363,6
-- neft-qaz sektoru	405,2	111,8
-- banklar	623,9	1 102,4
-- digərləri	472,0	149,4
- digər investisiyalar	437,7	1 444,2
Neft bonusu	20,0	2,0
CƏMİ	5 811,5	7 587,5

Mərkəzi Bankın tədiyyə balansına dair şərhində deyilir ki, birbaşa investisiyalar formasında xaricdən cəlb olunmuş sərmayələrin ümumi məbləği 4,0 mlrd. dollar olub ki, bu investisiyaların strukturunda neft-qaz sektorunun xüsusi çəkisi 78,7% təşkil edir.

Kreditlər və digər investisiyalar formasında cəlb olunmuş sərmayələrin həcmi illik müqayisədə 34,6% artıb, onların xarici kapitalın strukturunda xüsusi çəkisi isə 1,4 faiz bəndi artaraq 47,6% təşkil edib. Cədvəldən göründüyü kimi, artım kreditlər deyil, yalnız «Digər investisiyalar» təsnifatına aid olan vəsaitlər hesabına baş verib.

Tədiyyə balansına əsasən, əvvəlki dövrlərdə cəlb olunmuş kreditlər üzrə 1 638,5 mln. dollar miqdarında vəsait geri qaytarılıb. Hesabat dövründə qaytarılan kreditlərin 46,3%-i (758,4 mln. dollar) bank sisteminin, 13,6%-i (223,4 mln. dollar) dövlət və dövlət təminatı əsasında cəlb olunmuş kreditlərin, 28,5%-i (466,3 mln. dollar) neft-qaz sektorunun, 11,6%-i (190,4 mln. dollar) isə digər müəssisə və şirkətlərin payına düşüb.